Mizorama MLA inthlan neih turah BJP-in sawrkara tel ngei an tum thu an sawi danah leh tunhnaia MNF an beih tak chiam hnu ah chuan an thawhpui tum a chiang tih Congress thupuangtu Ronald Sapa Tlau chuan a sawi.
MPCC thupuangtu hian October 28 khan AIR news chuan Delhi BJP Hqrs. in Mizoram inthlanah BJP chu sawrkar lamah a tang dawn, tih a puan thu leh, BJP National president JP Nadda chuan October 27 khan MNF sawrkar SEDP hnuaia eirukna tam lutuk chu an sawrkar chuan chhuitir an tum tih leh, an financial mismanagement chu chhui an tum thu a puang tih a sawi. MNF pawhin BJP-in hmelma doa an rawn do tak mai thu an puang tih a sawi bawk.
Mizoram politic zirmiten BJP-in a tam berah Assembly bial 6 bak an lak theih an rin loh mek laiin, BJP-in an candidate pakhat deputy CM a nih tur thu an puan hmak ngam danah thil langchiang a awm tih sawiin, “Tunhnaia an rawn beih mawlh mawlh tak party (MNF) ni lo, regional party dang thawhpui atana biakrem an nei tawh a ni ang tih leh, an biakfel party chuan CM post an chanin an lungawi a ni tih leh, deputy CM post pekchhuah pawh an lungawi a ni tih hi a ni,” a ti.
BJP thawhpui atana MNF ni lo, thawhpui theih an neih dang chu ZPM chauh an ni rih tih Ronald Sapa Tlau hian sawiin, “BJP-in an thawhpui tur an tiualau ta mai hi an thawhpui tur tan phei chuan an tawmna buka atom bomb rawn thlak ang hial a ni ang,” a ti. Tuten emaw hidden agenda-a an lo neih chu khulama an partner-te fimkhur tawk loh vang nge, open agenda a lo ni ta, tiin a sawi a ni.
Chief minister atana zawrh zingah Pu Zoramthanga chu Zopa nelawm tak, Kristianna ngaipawimawh tak, mi invawng fel, thusawi leh a thutiam tam tak umpha lo a nih thu te; Pu Lalduhoma chu pa chhuanawm, thluak tha leh thusawi thiam, mi rilru hmin thei tak a nih laiin, rei tak a lo tlangaupui tawh, ‘DAH’ chu a sawi ngai tak loh thu te, sawhthing kg.1 ah Rs 50 a lei a lo tiam fo tawh chu kumin October 23-a interview-naah a leitu tur an zawnsak tur thu leh an sawrkarin lei a tum loh thu a puan leh tak daih thu te, CM a nih chuan portfolio a chang lo ang, tia a lo sawi thin laiin he interview-ah vek hian portfolio tlem azawng a chan tur thu a sawi leh thu te a sawi a ni. Pu Lalsawta erawh thusawi thiama sawi phak loh, lemchan thiam lo, thutiama dingnghet, mithiam chungchuang, sawrkar kaihhruaina lam experience nei tha em em a ni tih a sawi a. “Congress party manifesto te hi a vaia tihhlawhtlin tum tlat a ni,” a ti.
BJP-in MNF a beih hian an thawhpui tum a chiang – MPCC thupuangtu
