BJP-in ram inthen hran vanga tawrhna Ni hmang

BJP-in ram inthen hran
vanga tawrhna Ni hmang
BJP Mizoram chuan Ningani khan ‘Partition Horrors Remembrance Day’ hun an hmang.
BJP State president Dr K Beichhua, MLA chuan, British laka zalenna kan hmuh khan, India ramin hun khirh tak leh harsa tak a tawk a, he thil thleng hi India mipui tam takin kan hre tawh loa, Congress party chuan khang hunlaia harsatna kan tawh kha theihnghilh a, hriatreng ngai ti lo mah se, a hunlaia India ramin harsatna a tawh kha theihnghilh mai loa, mipui tawrhna avanga vawiin thlenga na te tuam dam an nihna tura hmalak dan kan hriat phah theihnan leh khatiang harsatna, nunrawng taka chetna ang kha India ramah a thlen tawh lohnan Prime minister Narendra Modi chuan kum 2021 khan August 14 hi ‘Partition Horrors Remembrance Day’ atan a puang tih a sawi a ni.
India ramin kum 1947-a political independence a neih a, India leh Pakistan inthen a nih dawnin, religious base-a kalpui a nih avangin Pakistan lama awm Hindu-ten India rama luh an duh a, India rama awm Muslim-ten Pakistan lama haw an duh a, an awm duhna lama an haw kawngah inlambunna a thleng nasa in, mipui maktaduai 2 vel chuan he partition avang hian nunna an chan phah tih a sawi.
“India-in zalenna kan neih nana nunna chan ta te, partition avanga nunna hlu tak chan ta te kha he ni a lo thlen hian kan hriat thar leh a ngai a, hetiang hun hi thleng nawn tawh lo se, chi leh chi, hnam leh hnam leh sakhuana avanga tharum thawhna chhuak thin hian min siamtha ngailo tih kan hriat tharna ni lo ni rawh se,” Dr K Beichhua hian a ti.
Inkhawm zawh hian hian Partition Horrors Remembrance Day pual hian ‘silent march’ an nei a, BJP State office atanga tanin Vanapa Hall kawt thleng kawng an zawh a ni.