Bharatiya Janata Party (BJP) te chuan April 14 khan election manifesto ‘Sankalp Patra’ tih chu an tlangzarh ta a. Narendra Modi chuan Lok Sabha manifesto tlangzarhna chu neiinmirethei, thalai, loneitu leh hmeichhia te thlurbing tur tia sawiin khawvelin hun khirhkhana tawh mek laiin sorkar ngelnghet neih a ngai tiin a sawi bawk.
“Tun hnai kum 10 chhungin BJP te chuan an manifesto tin te a tihlawhtling vek a ni. BJP te chuan manifesto hlutna a chawi nung leh a ni” tiin Modi chuan a sawi a.
“Khawvelin hun khirhkhan a tawh mek laiin majority sorkar ngelnghet kan mamawh a ni” tiin Modi chuan a sawi bawk.
Modi chuan BJP te chuan ‘one nation, one election’ an kalpui tur thu sawiin chubakah Uniform Civil Code chu ram pum tana tha tiin an kalpui ngei tur thu a sawi bawk.
“BJP te chuan June 4a inthlan result puan a nih atang chiahin thutiamte tihlawhtling turin hma a la nghal ang” tiin Modi chuan a sawi bawk.
BJP manifesto chuan’one nation, one poll’ chungchang tesawiin common electoral roll ruahman te, train travel waiting list tihtawp te, 5G network tihlen te leh Ramayan festival huaihawt te pawh a sawi lang.
Tamil Nadu ah kaw hreuh hle tumin Modi chuan BJP te an sorkar leh chuan khawvel hmun tinah Thiruvalluvar cultural centre din a ni ang a ti a. “Khawvel hmun tinah Thiruvalluvar cultural centre din a ni ang a. Tamil language upa ber hi kan chuang a ni. BJP te chuan Tamil language khawvel huapa tihlar nan theihtawp a chhuah ang” tiin Modi chuan a sawi. Thiruvalluvar chu Tamil poet leh philospher zah leh ngaihsan em em a ni.
BJP te chuan manifesto siam tur hian member 27 awmna committee dinin Defence Minister Rajnath Singh an a kairhuai a, party chuan manifesto a telh tur te hrual mum nan hian kawng hrang hrangin hma a la a ni.
Union Minister Rajnath SIngh chuan BJP te chuan an thutiam an tihhlawhtlin avangin mipui ten an rign tia sawiin Prime Minister Modi guarantee te chu 24-carat gold tluk a ni a ti a. Singh chuan BJP manifesto chu world politis ah pawh gold standard a ni a ti bawk.
BJP sorkar in hmasawnna a hnathawh te a sawi lan bakah women’s reservation law siam te, Article 370 uaibo leh Ram temple sak te chu an thutiam an tihhlawhtlin a sawiah a sawi lang bawk.
BJP manifesto ‘Sankalp Patra‘ tlangzarh
