BJP kaihhruai sawrkar hnuaia thil dik lo ni ngei an ngaih, siamthat phutin Congress party chuan Ningani khan India ram pumah lungawilohna an lantir a. Mizoram Pradesh Congress Committee pawhin hei hi zawmin, lungawilohna an lantir.
Congress Bhavan-a hun an hmanah MPCC president Lal Thanzara chuan lungawilohna lantir chhan a sawifiah a. August 13 khan All India Congress Committee Hqrs New Delhi-ah AICC president Mallikarjun Kharge, Lok Sabha-a leader of opposition Rahul Gandhi, AICC general secretary-te leh Pradesh Congress Committee president-te thukhawm rel angin, August 22 hian India ram hmun hrang hranga Enforcement Directorate office kawtah leh hmun pawimawh dangah protest leh demonstration nei tura tih a ni.
Neih a nih chhan chu, Prime minister Modi kaihhruai sawrkarin Adani Company hmanga nasa taka mipui sum tichingpen leh stock market-a sum invest-tu, India mipui maktaduai telte sum vaibelchhe sing tam tak hloh tir an nih chungchanga chhuitu Security Exchange Board of India (SEBI) chairman pawh he thil dikloa inhnamhnawih ni ngeia a lan avanga chhuithat duh loh leh thil diklo chulmam (cover up) tumna awm ni ngeia a lang duh lohna lantirna a ni.
He thil dik lo chhui a nih theih nan Joint Parliamentary Commitee ruat turin sawrkar laipui an phut a. India rama hnam hnufual zawkten an chanvo dik tak an chan theih nan Caste Census neih thuai an phut bawk. ‘India ram hnam hnufualte socio-economic status dik tak hriat a nih theih nan caste census hi tihmakmawh a ni,’ an ti.
Hei bakah hian India Danpui zah leh zawm a nih a, mipuiin chanvo leh zalenna kan neihte humhim a nihna turin, thu mai ni lo, a taka hma la turin sawrkar laipui an phut tih an sawi a ni.
BJP sawrkar hnuaia thil diklo nia an sawi siamthat an phut
