BJP sum hmang lo chhun Congress
– Lal Thanzara
MNF leh BJP an thawkdun tawh a, tun MLA inthlan zawha BJP-in deputy chief minister post an beisei nghal ngam khan ZPM pawhin a thawhpui tih a langchiang tih Congress president Lal Thanzara chuan a sawi.
Sinlung Hills Council inthlan tura campaign MPCC president chuan, Mizoramah Congress chiah hi BJP sum hmang lo awmchhun an ni tih a sawi a. MNF kha BJP nen an thawk dun a, an sum hmangin an sawrkar a. Mah se, BJP thu an awih loh avangin BJP-in an han hrek tak tak a, sawrkar hnathawkte pawhin a hunah hlawh an la thei lo tih a sawi.
“ZPM pawh hian BJP an thawhpui a ni tih a lanna chu, BJP candidate pahnih dinna Siaha leh bial dang pakhatah khan candidate an dah ve lo. An sawrkar chiah khan Siaha bialtu MLA Dr K Beichhua phei chuan deputy chief minister nih a rawn tum nghal chat a. Mahse mipui leh kohhranmite mitmei an ven avangin BJP duhdan an zawm thei ta lo a ni,” a ti.
ZPM sawrkarin cheng vaibelchhe tam tak nei mah se, hmunphiah an lei thei tlat lo tih Lal Thanzara hian a sawi a. Tunah sawhthing an lei thei angem tih chu zawhna a ni tih a sawi.
“Sawrkar hian lehkhathiam ho tan a pung awm loin loan pek a tum a, lehkhathiam lo tan chuan beisei tur a awm lo. Congress chuan lehkhathiam chauh ni lo, chhungkaw harsa leh kuttual leichham thlengin NLUP kan pe a. Tunah hian thingtlanga kan mi leh sate hian NLUP hi kalpui leh turin min ngen nasa em em a ni,” a ti.
NLUP vang khan mi tamtak an ding chhuak a, sum lengvak a tam phah a, Mizoramah bank a pun phah nia sawiin, “Congress party hmalam hun a eng em em a. Inthlan lehah chuan kan dinhmun a danglam tawh ang,” MPCC hruaitu hian a ti.
BJP sum hmang lo chhun Congress – Lal Thanzara
