BJP te chuan Lok Sabha inthlan atana candidate an vawrhchhuah tur a thawhkhatna tur puangin State 16 leh Union Territory pahniha an candidate tur 195 te an tarchhuak a. Prime Minister Narendra Modi chuan a parliamentary seat ngai Varanasi-ah bawk a ding leh ang.
Candidtae 195 tarchhuah hmasak zinga 107 chu backward community te an ni a, Scheuled Caste 27 awmin, Scheduled Tribe 18 leh Other backward classes (OBCs) 57 an awm bawk a. Hmeichhe candidate 28 awm bawkin candidate 47 lai chu kum 50 hnuai lam an ni a. Muslim candidate pakhat Abdul Salam chuan Malappuram, Kerala atangin a chuh dawn a ni.
“BJP leader te hnenah lawmthu ka sawia mahni hmasial lo Party Karyakartas vaibelchhe tel te hnenah pawh keimaha rinna an nghah avangin ka lawm a ni. A tum thum nan ka Kashi unaunu leh unaupate tan rawngbawlsak che u ka tum leh dawn a ni,” tiin Prime Minister chuan a sawi a.
“Kum 2014 khan Kashi-ah mipuite beiseina tihlawhtlinga miretheite tichak tura inpein ka kal a. Tun hnai kum sawm chhungin sector hrang hrang nasa taka tihmasawnin Kashi tha zawk kan thlir tlat a ni. Nasa zawkin kan thawk chhunzawm zel ang a, Kashi mipui tena malsawmna min pek avangin lawmthu ka sawi tak meuh meuh a ni,” tiin a sawi bawk.
MP sawisel hlawh Malegaon blast case a puh meka awm Prgya Singh Thakur, Bhopal te leh Ramesh Bidhuri, South Delhi te MP pui Danish Ali laka communal kaihhnawiha Lok Sabha-a ankhuma puh te chu seat an pe lo va, Bhpal mayor Alok Sharma leh Ram Vir Singh Bidhuri ten an thlak ve ve a ni.
Minister 34 ding nawn dawn
List thawhkhatnaah hian Union Minister 34 lai an awm a, chung zingah chuan Rajnath Singh chu a dinna ngai Lucknow-ah a ding leh ang a, Amit Shah pawh Gandhinagar-ah leh Smriti Irani pawh Ametjhi ah bawk a ding ang. Mahse, Minister of State Meenakshi Lekhi erawh a New Delhi seat chu chhuhsak a ni thung.
Madhya Pradesh Chief Minister hlui tuna State MLA Shivraj Singh Chouhan chu Vidisha-ah a ding ang a, Tripura Chief Minister hlui Biblab Deb pawh Tripura West-ah a ding bawk ang.
Minister ni lai mek Rajya Sabha MP ni bawk zingah Labour Minister Bhupendra Yadav chu Alwar, Rajasthan-ah a ding ang a. Health Minister Mansukhbhai Mandaviya pawh Porbandar, Gujarat ah a ding anga, Rajeev Chandrashekhar pawh Thiruvananthapuram-ah dingin Congress MP Shashi Tharoor nen an intum hmel a ni.
Delhi-ah thlan danglam Candidate thawhkhatna hi Central Election Committee (CEC) tena February 29 meeting reitak an neiha an thutlukna niin mak tak maiin East Delhi MP Gautam Gambhir chuan list tihchhuah hma lawkin a din loh tur thu a puang a ni.
Uttar Pradesh a candidate tur puan 51-ah thlak danglam a awm mang lo va, MP 43 lai chu an dinna ngaiah an ding leh vek dawn a, chung zingah chuan film star hlui Hema Malini pawh Mathura-ah a ding leh ang. Kum 2019-a BJP te seat hlohah mithar dah ni hlawmin chung zingah chuan Shravasti-ah Saket Mishra, PM Modi principal secretary hlui Nripendra Mishra fapa pawh a tel. UP a Jaunpur-ah Mumbaqi a inbun Congress MLA leh Minister pawh ni tawh Kripashankar Singh chu a ding dawn bawk a, Krishna Pratap a thlak ang.
Delhi-ah Manoj Tiwari chu North East Delhi ah thlakin a awm a, BJP te chuan seat nga a ding tur an puanah seat li-ah mithar an dah a. External Affairs Minister hlui Sushma Swaraj fanu Bansuri Swaraj chuan Meenakshi Lekhi a thlak ang a. Chandni Chowk seat-ah traders’ association chief Praveen Khandelwal chuan Dr. Harsh Vardhan a thlak bawk ang. West Delhi-ah pawh Pravesh Singh Sahi chu Kamaljeet Sehrawat an a thlak ang a, South Delhi ah Ramvir Singh Bidhuri chuan Ramesh Bidhuri a thlak ang. BJP te hian North-West leh East Delhi a ding tur an la puang lo.
West Bengal candidate
West Bengal-a candidate tur 20 an puan hmasakah sitting MP pakua an tel a. State president Sukanta Majumdar leh Union Minister of State Nisith Pramanik leh Subhas Sarkar te pawh an tel. MLA ni lai mek pathum Manoj Tigga, Hiranmoy Chatterjee leh Sreerupa Mitra Choudhury te pawh candidate puan zingah an tel a. Alipurduar sitting MP John Barla erawh hnawlin a awm thung.
Chhinchhiahtlak tak chu Bhojpuri actor Pawan Singh leh Soumendu Adhikari, West Bengal Leader of Opposition Suvendu Adhikari unaupa chu seat chang zingah an tel a. Suvendu Adhikari pa Sisir Adhikari erawh Kanthi atanga Trinamool Congress MP a ni thung a. BJP leader Anirban Ganguly chu Jadavpur Lok Sabha seat pek a ni.
Rajasthan atanga ding tur 15 puanah pariat chu MP ni lai an ni a, hmel thar pasarih an awm thung. Lok Sabha Speaker Om Birla chuan Kota bawk a chang leh a, BJP state president C.P. Joshi chu Chittorgarh atangin a ding ang a, Union Minister Gajendra Singh Shekhawat leh Arjun Ram Meghwal te chu Jodhpur leh Bikaner atangin an ding ve ve ang a. Indian Paralympics player gold medal pahnih la hmasa ber Devendra Jhajharia chu Churu atangin BJP ticket in a ding dawn bawk.
BJP te chuan CEC meeting tum hnihna March 6 ah nei leh dawnin hetah hian State dang danga ding tur te chu tihchian a nih rin a ni.