BJP thu kalpui dan hi a him lo – Lalrinpuii

ZPM hruaitu, minister Lalrinpuii chuan BJP thu kalpui dan chu Mizo Kristiante tan a tha lo a, vote chi an ni lo tih a sawi.
Thawhlehni zinga Hnahthiala MP inthlan campaign an neihnaah minister Lalrinpuii chuan BJP chu vote chi an ni loa, Health & Wellness Centre te pawh tunah chuan ‘Ayushman Arogya Mandir’ tia thlak vek turin an ti tih a sawi. “BJP ideology, one religion, one nation tih aupuitute an nih avangin Mizo Kristiante tan chuan a tha lo em em a ni,” a ti.
ZPM mi leh sa ngei MP kan neih chuan state sawrkar nen inngheng rialin hna nasa takin an thawk thei dawn a, an project siamte Delhi tlanga lo bawhzui tur a ni dawn tih a sawi a ni.
ZPM MP candidate Richard Vanlalhmangaiha chuan, Pathian leh mipui zara MP atana thlantlin a nih chuan ramin hmasawnna rotling neih theihna turin theihtawp a chhuah dawn a, Mizoram sawrkar leh sawrkar laipui inkara indawrnaah leihlawnah a tang dawn tih a sawi. Sawrkar tharah kuthnathawktute chawikan nan hma nasa taka lak a ni dawn a, tunlai thiamna leh khawl changkang zawk hmangin loneitute tana awlsam leh hlawk zawka thlai thar sawngbawl dan pawh ngaihtuah a ni zel dawn tih sawiin, “Chumi atan chuan sawrkar laipui hnuaia kuthnathawktute tana hamthatna awmte tun aia nasa zawka haichhuah kan tum dawn a ni,” a ti.