Blatter ai pawh khan Infantino hi a la chhe zawk – Klopp
Fifa president ni rei tak Sepp Blatter kha a ban dawnah hmingchhiatna tam takin a bawm a, Fifa chhunga thamna leh eirukna bupui inkhuar nghet tlatte chu haichhuah a ni a, mahse, Germany manager Jurgen Klopp chuan Blatter ai pawh khan tuna president chelh lai Gianni Infantino hi a la fuh lo zawkin, a la chhe lehzual zawk niin a ngai!
Kumin July thlaa Germany head coach hna chelh tan Liverpool boss hlui hian Sepp Blatter-a kalbo hnu kha chuan a chhe zawnga thil a inher tawh loh a beisei laiin Blatter kha che nep te a nih thu leh a zualzapui vailenhlo tih ang mai a nih zui tak thu a sawi a, Fifa president tang lai Infantino chu thlak vang vang tur a nih thu a tarlang tel.
Pate ro ang maia ngaia mahni thua chawlh tum lo Swiss putar Blatter kha corruption scandal-in a nawr nat em avang chauhin kum 2015 khan Fifa boss a nihna atangin a bang hram a, February 2016-ah Infantino chuan a thlak.
Infantino hun a inherchhuak a, a term khatna chu a pangngai fu niin a lang a, kum 2023 khan chuhtu awm loa thlan nawn leh a ni.
Kum a kal leh det a, a ze pui a chhuah chho a ni ber ang chu – rawtna mak pui pui a rawn nei chho a, a sum duh luatah FIFA Forward Enterprise (FFE) proposal a tih mai hmanga Fifa tournament lian ber atanga a te ber thlenga mimal kuta luhtirte a rawt ta ruai a, World Cup leh Fifa competition dangte private investor rual kuta luhtir chu khawmualpui hrang hrang leh ram hrang hrang football pawlin an dodal sup sup a.
US president Donald Trump tlawn an tih avangin sawisel a hlawh bawk!
Nikum December thlaa World Cup finals draw denchhen khan FIFA Peace Prize an tih mai, award phuahchawp zet chu Fifa president hian Trump hnenah a hlan pek a; an sawisel luai luai a, Fifa Football Social Responsibility Committee lam ennawn tura dah a ni zui ta hial!
2026 Fifa World Cup lai lah khan Donald Trump inrawlh avangin US forward Folarin Balogun-a red card hmuh chu hnukkir a han ni leh kual kawi vel a!
Match official-te’n a loa luak chhuaka champion lai Argentina an tan nia khawvelin a ngaih theih tura boruak a han awm lehzelte khan Fifa president rinlohna leh tenna a tipunlun nasa hle!
Europe khawmualpui football thuneitu sang ber Uefa phei chuan kum 56-a upa Infantino an thlawpna an hnukdawk ni satliah mai loin a ban an phut a, khawmualpui dang thenkhat leh ram hrang hrang FA-te pawhin bang se an duh thu an auchhuahpui hlawm bawk!
Amah ber lah chuan ban chu sawi loh nakkum March ni 18 election hi chuh a la tum nghet bur a, he boruakah hian German coach Jurgen Klopp pawh a ngawi ral thei ta bik lo a, eiruk thubuai vanga hmingchhe zeta bang ta Blatter aia la chhe lehzual zawkah a chhuah!
Infantino hian mimal sumdawng kuta Fifa tournament hlan a tumna kha sutin, Fifa Council hnenah a ruahmanna duanchhuah avang khan ngaihdam dil tawh mah se ring thei tawh lo an kat nuk a, chu’ng zingah chuan Klopp pawh hi telin, khawvel football hruaitu lawk ber atana a fit tawh loh thu leh a thlak tak chhe zet aia pawha chhe lehchhawng niin a ngai nghet hmiah!
Klopp chuan sawi belhin, “Gianni Infantino chungchangah chuan a hnu chiaha rawn president tur hian hna a thawk tha zawk ang,”a ti hmiah!
Hetih lai hian ram hrang hrangte football hmasawnna sum dawn tur tihpun tiamtu Infantino president chuh leh tum boruak pawh hi a kang ve leh zel nite pawhin a hriat a; October thla khan Asian football hotupa chuan vantlang hriatah thlawpna nemnghetin, Fifa confederation hrang hrang leh Fifa hnuaia member association 211-te zingah pawh thlawptu an awm ve reng a ni.
Blatter ai pawh khan Infantino hi a la chhe zawk – Klopp

