Tunlai hian blood bank hrang hrangah damlo a mamawhte tana hman tur thisen dah khawl sa a tlem hlawm tih Association for Voluntary Blood Donation chuan a sawi. Association for Voluntary Blood Donation (AVBD) thuchhuak chuan, kum tawp lam Krismas vuakvetah pawl hrang hrangin tih tur an ngah thin a. Kumtir lam, January thla chu thisen pe thin pawl hrang hrang hruaitu insiksawi lai, kum khat chhunga hmalakna tur duan hun lai a nih avangin tih tur neuh neuh a tam a. Kumtin January leh December ah thisen pek a tlahniam a, pawl hminga thisen pek a tlem zual tih a sawi.
2025 January-ah pawh thisen pek a tlahniam hle a, thla dang zawng aiin pawl hminga thisen pe an tlem a. Blood bank hrang hrangin blood donation camp neihna tur an nei meuh lo tih sawiin, tunlai hian thisen mamawh an awm pawhin blood bank-a dah khawl sa lak mai tur a awm mang loa, thisen mamawhten thisen petu tur an zawn a ngai tlangpui tih sawi a ni bawk.
‘Hetiang hi kan dinhmun a nih avangin institution thenkhat biain, thisen pe turin kan ngen ngawt mai a. Kan ngenna ngaipawimawha thisen pe tura inruahman mek institution-te chungah kan lawm takzet a ni,’ AVBD chuan a ti.
Hemi rual hian, kohhran thalai pawl leh NGO-te thisen pe turin an ngen a. Damlo, thisen mamawh tam tak an awm reng laiin, blood bank hrang hranga thisen khawl sa a awm mang lo a ni tih hria in, tlawmngaia blood donation camp neih dan kawng zawng turin pawl hrang hrang an ngen thar a, mimal ang pawha thisen pek uar zel turin mitin an ngen tih a sawi a ni.
Hetihlai hian Aizawl district bika blood bank pathum awmah 2024 December chhunga Krismas puala a thlawna thisen pek chu unit 1278 a ni a, mipa 1032 leh hmeichhia 246 an ni. Civil Hospital Aizawl Blood Bank ah unit 944 pek a ni a, Synod Hospital Blood Bank-ah unit 118, ZMC Blood Bank-ah unit 216 an pe a ni.
AVBD, MSACS leh blood bank hrang hrang chuan kum danga an tih thin angin 2024 December chhung khan Krismas pual thisen pek an kalpui leh a, thisen pe turin Mizoram mipui, a bikin thalaite an ngen a. An ngenna leh sawmna mi tam takin ngaipawimawh a, Krismas pualin thisen an pe chu an lawm hle tih AVBD chuan a sawi.
‘Thisen petute inpekna leh tlawmngaihna a ropui kan ti a, an chungah lawmthu kan sawi a. Mi tana an inpekna hi midang tan malsawmna a ni a, damlo tam takin damna an chan phah a ni,’ a ti.
Blood Bank-ah thisen dah khawl a tlem
