Bollywood singer-in GWR siam
Bollywood film hrang hranga a aw lo thawh tawh, zaithian Palak Muchhal chuan Guinness World Records a siam a, a record siamna erawh rimawi lam ni lovin, midangte tana thil tha tih vang a ni thung.
Palak hian a unaupa Palash nen Palak-Palash Charitable Foundation an din a, he foundation kaltlang hian India-a naupang dinhmun harsa zawk, lung (heart) zai ngai te inzaina tur vawi 3,800 chuang an tum sak tawh a, chu chu GWR-in record-ah a puang ta a ni.
Palak hi Indore-a seilian a ni a, rel-a a zin thinnaah naupang dinhmun harsa tak tak, chaw-kaw-puar a ei ngai lo, thawmhnaw inbel tur pawh nei mumal lo tam tak a hmu thin a, a naupan deuh lai atang tawhin, “Heng naupang dinhmun harsa zawkte hi engtikah emaw chuan ka la pui ngei ang,” tih rilru a nei daih tawh a ni.
Tichuan, a lar ta a, a zaithiam avangin Bollywood film tam takah hla hit a nei tawh a, hei bakah hian India ram hmun hrang hrangah concert a nei kual zak zak tawh. Mahse, heng a concert te hi ama sum tuakna ni lovin, naupang harsa zawk, lung zai ngaite tanpui nana a sumtuakna a ni zawk.
2013-ah ringawt pawh khan Palak hian cheng vaibelchhe 2.5 tuak ngahin, naupang 572-in an nunna chhan nan an lung an zai theih phah a ni.
Bollywood singer-in GWR siam
