Bondi Beach-a inpawng kahna thlenga a titu nia hriat pahnih zinga pakhat zawk chu India chhim lam atanga Australia-a lut niin police-in an sawi a; mahse, a chawr chhuahnaa a chhungte nen hian an ‘inpawh lo hle’ tih an sawi.
Kum 50 mi, Sajid Akram-a hi Pathiannia Sydney-a pawi khawihna thlengah khan a thi ve nghal a, Telengana-a police hotu chuan an khawpui, Hyderabad chhuak niin a sawi.
Kum 1998-a Australia-a a insawn hnuah India-ah vawi ruk chiah a haw a, a chhungte pawhin ‘hetianga thil lak bikna rilru a pu leh a chet velna engmah an hre lo’ niin a sawi.
Sajid-a leh a fapa kum 24 mi, Naveed-a te hi Judaten an sakhaw hunpui pawimawh, Hanukkah an hman tan nia mi 15 thattu leh mi thahnem tak hliamtua puh an ni.
Telangana police thuneitu sang chuan BBC Telugu hnenah Sajid-a hian ‘Australia-a a pem hnuah India-ah vawi ruk chiah a la zin a, a zin pawh hi chhungte thila ro leh hmunhma inrochun thil leh a nu leh pa upa tawh takte tlawha zin’ a ni thin tih a sawi.
“A pa thih pawhin India-ah hian a haw lo a ni,” a ti.
“Hetianga Sajid Akram-a leh a fapa, Naveed-a ten eng thil emaw kal fawrpuia an chetna leh India emaw, an chawr chhuahna, Telangana emawa an thil tawn leh tih nen inzawmna a nei lo,” a ti.
Sajid-a hian India-ah dan bawhchhiatna a nei lo bawk a, degree zovin Australia-ah hna zawnga kalin ‘European chhuak’ nen an innei zui a ni.
Indian passport a nei a, a fate erawh Australia-a piang vek niin Australian khua leh tui an ni tih a sawi.
Police chuan pawi an khawih hma lawka an pafaa Philippines-a an zin chhan an chhui mek a. November 1-ah chhuakin November 28-ah an let leh tih an ram immigration bureau chuan a sawi.
Sajid-a hi Indian passport hmanga zinin a fapa erawh Australian a nih avangin an ram mi a nihna hmangin a zin tih thuneitute chuan an sawi.
Australian Broadcasting Corporation (ABC) chuan an pafa hian thliarkar ramah hian ‘sipai anga chet theihna tura inzirin’ an zin niin an puang a; mahse, thuneitute atanga finfiahna erawh a awm lo.
Philippines Foreign Affairs Minister Maria Theresa Lazaro leh Australian Foreign Minister Penny Wong chuan Bondi Beach-a inpawng kahna thleng chhuinaah ‘thil engkim tihho zel ni se’ an ti tih chanchinbu mite hnena Lazaro-i’n text message a thawnah tar lan a ni.
ABC chuan Naveed-a hi a hmain Sydney-a IS terrorism cell nen inkungkaihna nei nia hriat a nih avangin chhui a ni tawh niin a tar lang bawk.
IS hi Islamist firfiak pawl, kum 2015-a Paris beihna telin Europe leh America-a pawi lian tak tak khawihtu nia inchhal an ni.
Australian Prime Minister Anthony Albanese-a chuan Naveed-a hi kum 2019 khan ‘mi dangte nena an in pawhna avangin’ thuneituten an lo thlithlai tawh tih a sawi.
Bondi Beach-a mi pawng kahtu pakhat zawk Indian
