Book of the Year chawimawina hlan
Mizo Academy of Letters (MAL) chuan 2022 chhunga Mizo tawng lehkhabu chhuak tha ber atan Dr. Zohmangaihi ziak “Daidanna Bang Phena Thuruk” a thlang a, Nilaini khan ‘Book of the Year, 2022’ chawimawina hi a dawngtu hnênah MAL chuan a hlan.
MAL din champha puala inkhawm, Central YMA Hall-a buatsaihah hian khuallian R Lalzirliana, art & culture minister-in chawimawina thuchei (citation) leh pawisa fai Rs. 10000 chu Dr. Zohmangaihi hnênah hian a hlan a ni.
MAL president, Prof. RL Thanmawia kaihhruai he inkhawmah hian, Book of the Year thlangtu Committee Secretary, Dr. C.Lalawmpuia Vanchiau-in a tarlan dan chuan, 2022 chhung khan lehkhabu 203 a chhuak a, hêng zîngah hian hmun hniha thena hmun khat aia tam chu Christian Literature a ni. Lehkhabu khâwn khawm zîngah hian bu 5 hi Myanmar rama chhut leh chhuah a ni a, Tripura lam chhuak pahnih a awm bawk. Hêng lehkhabu atang hian lehkhabu 36-ah insawrbing a ni a, chuta tang chuan top 20 thlan a ni a, chumi hnuah top 10 thlan leh niin chuta tang chuan Top 3 thlan leh a ni a, tichuan a tawpah Dr. Zohmangaihi ziak, ‘Daidanna Bang Phena Thuruk’ tih chu a thlang ta a ni.
MAL din champha leh Book of the Year lâwmman hlan inkhawmah hian MAL member ziak lehkhabu 4 chu khuallian hian a tlângzarh a, Mizo tawng humhalh leh tihhmasawn chu hnam tana thil pawimawh tak a nih thu a sawi a ni.
He inkhawmah hian Mizoram district hrang hrang leh Myanmar lam atanga MAL member thahnem tak an tel