Book of the Year lawmman hlan
April ni 23 khan Mizo Thu leh Hla Inpui (Mizo Academy of Letters)-in 2025-a chhuak Mizo lehkha tha bera an thlan “Kham leh Suar” ziaktu Lalrammawia Ngente hnenah Book of the Year lawmman an hlan.
April ni 23-ah an pawl din champha an lawm thin a, hemi ni hian Book of the Year lawmman hi an hlan thin a ni.
I&PR Auditorium-a hun hmanah art & culture director Carol VLMS Dawngkimi, khuallian-in Book of the Year chawimawina thuziak leh pawisa fai Rs 10000 a hlan.
Khuallian chuan chawimawina dawngtu Pu Lalrammawia Ngente a lawmpui thu a sawi a, dawng awm tak tak an awm teuh laia hetiang chawimawina hlu tak dawng theia a awm chu malsawmna leh vanneihna a nih thu a sawi. MAL chu pawl zahawm tak a nih thu leh Art & Culture Department nen pawh an thawhhona leh in zawmna a that thu a sawi a, thu leh hla hi mihring nun min siam thatu leh nun kawng dika min hruaitu a ni tiin a sawi a, khawvel leh India ram sukthlek thlirin, kan hnam nunphung, history bakah thawnthu phuah tharlam pawh kan uar deuh deuh a tul, a ti.
“He lehkhabu hian mihring nun chhungril khawharna leh hmun hlauhawm tak tak a hai lang a, khawtlang nun inthlak meka sual ngaihzamnain nun a tihchhiat dan te, Pathian hmangaihna leh beiseina nungin sual thûk taka tlu tawh pawh a tuam dam theihzia te thiam takin a tar lang a ni. Chuvangin, Thu leh Hla Inpui (Mizo Academy of Letters) chuan kum 2025 chhunga Mizo tawnga chhuak lehkhabu zinga tha ber ‘Book of the Year 2025’ atan a thlang a ni,” tiin chawimawina thuziakah an ziak.
Chawhnu lamah Prof. Rualkhuma Colney, Mizo Thu leh Hla Inpui vice president kaihruaiin hun an hmang a, Dr. Lalthlamuana Ralte buatsaih ‘Tunlai Thiamnain Mizo Thu leh Hlaa Hnuhma a neih dan’ tih a zirho.
Book of the Year lawmman hlan
