Boruak nei lian Norway in England an ngam lo

World Cup 2026 quarter-final a inkhel ngaihven hlawh takah boruak nei lian leh tan hlawh tak Norway chu England lakah an vanduai a, semi-final lut zo lovin an tla. Norway hnehtu England hian champion lai Argentina an hmachhawn zui leh dawn.
Football hmuchhuaktu England leh 1998 hnu lamah a vawi khat nana World Cup khelh phak ve leh nawlh Norway te hi Hard Rock Stadium ah an inhmachhawn a, inkhel hmuhnawm tak an lantir. Inkhel hmuhnawm takah hian minute 90 chhungin chak zawk an awm thei lova, si nghak Nyland vanduai vangin Three Lions in hnehna hlu tak changin, semi-final an lut.
England leh Norway te hi forward nei tha team an ni a, tunlaia striker hot pahnih Harry Kane leh Erling Braut Haaland te an awm vangin an inel turin ngaihven a hlawh hle. Forward an neih that viau laiin an tlarhnung a phui lo ve ve thung a, defence line chu an panna lai a ni dun. Position tin a khel tur khaikhawmin England in player an nei tha zawk a, an squad a chhah zawk viau bawk. Squad pan zawk ni mah se an khelh that tluan em vangin Norway hi hmachhawn an chakawm loh hle bawk.
Inkhel tan a ni a, team hnihte an inhnehtawk hle. An tlarhnung an veng nasa ve ve a, ngaihven hlawh Haaland leh Kane te an langsar lo viau. Team anga thawkchho tha tak Norway an che fuh hmasa a, Andreas Schjelderup chuan minute 36-naah tha fu si, vanneihthlak ang reng tak siin hmahruaina goal a thun. Andreas Schjelderup sut siam chu Jordan Pickford dan rual lohin a goal. Goal thun hmasa zawk an nih vangin Norway an phur a, khelmual chhunga an mahni tantute au thawm a ring hle.
Goal an chhuah hnuin England an insiamtha a, goal thun ngei tumin tan an khawh. Norway si nghak Nyland ball petchhuah sang tak chu hma lamah thlawk zel lovin mak tak maiin a kuai thla ngawt a, England in ball an chan phah. Three Lions hian fuh zetin an khingpuite an nawr zui nghal. Anthony Gordon ball pek tha tak chu Jude Bellingham chuan fuh zeta khalh tlangin a pet goal a, minute 45+2-ah an si phurh a su a, 1-1 inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Norway in goal an thun hmasa leh. Corner pet a nih hmaa Haaland a lo foul vangin Norway goal thun hi hnawl a ni thung a, England an him hlauyhh. Norway hian goal an thun teuh hle a, vanneihthlak takin Three Lions an him hram a ni ber a, an derthawng ru hle.
Goal thun tumin innawr zui viau mah se hun pangngaiah goal thun belh thei an awm lova, minute 30 dang khelhbelh a ngai. Extra-time-ah Norway in fuh takin an khingpuite an nawr tlang a, goal thun theihna hun tha zet an nei. Alexander Sorloth leh Haaland ten England defender pakhat chauh an hmachhawn laiin Atletico Madrid forward Sorloth chuan ball pek remchang taka awm Haaland ball pe mai lovin pet goal a tum a. England defender ten an zimbuai hman vangin goal-ah a chantir thei lova, holam takin a chhuah. Haaland a pe mai lo hian sawizui a hlawh rei hle ngeiin a rinawm.
Uiawm taka an hun tha neih an chhawr tangkai loh hnuin Norway an vanduai chhunzawm a, uiawm takin goal an chhuah. England midfielder Morgan Rodgers shot tha pangngai tak man a tumna lamah si nghak Nyland a chesual a, ball a man per. Ball per let leh hi Jude Bellingham tan pet nuam tawk chauh, duhna hmun taka pet theih a ni a, Bellingham hian awlsam taka pet goal in minute 93-naah hma an hruai letna goal a thun. Bellingham hi England tan a chetha chhunzawm zel a, an khelh hnuhnung pahnihah goal li thungin WC 26-ah goal 6 a thun tling der tawh.
Norway in an si phurh sut tum viau mah se an Haaland tel lovin an hriam tawk lova, an hun tha neih an chhawr tangkai thei lo bawk nen England lakah uiawm taka tlawmin World Cup 2026 an mangtha ta a ni.