Boruakalhthei putna hnai metre 500-ah awm leh phal tawh
Assam-a tuialhthei thlitfim loh khura boruakalhthei put mek chu ni 11 a liam hnuah ONGC chuan a bul hnai metre 500 huam chhung aia hlaa mi insasengte chu an ina haw turin a him leh tawh thu leh nun dan phung pangngaiin thuk leh electricity pawh an hmang thei tih an sawi.
Pathianni khan Sivasagar district-a boruakalhthei pui chungchangah hian ONGC chuan chhin phui vek tur chuan khawl lian tak mamawh a la nih thu an sawi.
June 12 atang khan ONGC hmun, Bhatiapar, Barichuk-a Rudrasagar Oil hmunah hian boruakalhthei a put a, he hmun hi mi mal firm, S K Petro Services-in sorkar company hnuaia a enkawl mek a ni.
“Oil & Natural Gas Corporation Ltd chuan Cudd Pressure Control-a mi thiamte nen mel lung pawimawh tak kaiin Well RDS#147A-ah hian beihpui an thlak mek zel a ni,” an ti.
ONGC hnuaia Crisis Management Team leh mi thiamte chuan lei laihna hmanrua chi hrang hrang trailer phur 10 vel a hmun atang hian an phur chhuak tawh a, hei hi boruakalhthei put mekna khur chhinna tura hna thawhna tur khawl lian lak luhna tur atana tih a ni.
“Khawl lian hmanga chet chhuahna turin ruahmanna kalpuia inbuatsaih mek a ni,” an ti.
Team chuan a hmuhma leh chetsualna thleng palh thei zawng zawng an thlithlai a. A bik taka siam extra-long boom crane lak luha hna thawh a ngai dawn a, hei hi a hma thei ang bera tih a ni dawn tih ONGC chuan a sawi.
Himna atan a chhehvelah hian tui pawh phuh leh dah reng a ni a. ONGC hian district thuneitute pawh heng lai hmun chhuahsana relief camp-a awmte enkawlna kawngah a pui reng tih an sawi bawk.
Boruakalhthei put avang hian a chhehvel khuaa chhungkaw 330 chuang chu an insaseng a, a ni tin mamawh leh himna tur thilte chu Banhoan-a an tana siam camp-ah ngaihtuahsak zel an ni.
Assam sorkar chuan heng chhungkuate hi suma puihna Rs. 25,000 theuh a pe tawh a. Zirtawpni khan ONGC thuneitute chuan Chief Minister Himanta Biswa Sarma hnenah boruakalhthei putna khur chu an chhin phui vek dawn tih a sawi.
Thil chhia leh zangnadawmna pek ngaite pawh district thuneitute nen an sawiho vek dawn tih ONGC chuan a sawi.
ONGC hotu sang pakhat chuan boruakalhthei putna khur hi tuialhthei thlitfim loh khur, engmah lak chhuah ngai tawh lohna niin zone transfer tih a nih mek laiin a put chhuak palh ta niin a sawi.
Boruakalhthei putna hnai metre 500-ah awm leh phal tawh
