Montreal khawpuia an ram tournament lian Canadian Open khelh mek second round-ah Nilaini khan world number five hlui Eugenie Bouchard chu 6-2, 3-6, 6-4-in 17th seed Belinda Bencic lakah a tlawm a, he tournament-a a champion emaw a tla emaw a nih rual ruala a tennis career zialfel a tum thu a lo sawilawk tawh ang ngeiin professional tennis a chawlhsan ve ta.
IGA Stadium-a tennis a mangtha tumin kum 31 mi hian a match hnuhnung ber Montreal ngei maia a khel thei chu dangdai a tih thu leh a chipuite hmuh lai ngei maia a hun hnuhnung a hmang thei chu nihlawh a intih thu a sawi.
Bouchard chuan amah thlahna hun (retirement ceremony) tawi an buatsaihah thu sawiin, “He lai khelmual thutthlenga hmeichhe naupang ni chunga ka thut thin lai leh engtik niah emaw chuan he court ngei maiah hian ka la inkhel ve ang a tia ka lo suangtuah thin chu ka tihlawhtling thei a; he hmun ngeia ka hun hnuhnung a rawn kualchhuak lehte hlei hlei hi ka tan a hlu a ni,” a ti.
Tennis inelna a bansan rualin Eugenie Bouchard hian 2024 season atanga a lo zawm tawh Professional Pickleball Association Tour lam a khelh chhunzawm dawn a ni.
A tennis zinkawng bikah chuan Bouchard-i tana kum tha ber chu kum 2014 kha niin, kha mi kum khan Wimbledon final a khelh bakah French leh Australian Open semi-final a thleng ve ve a ni.
Bouchard chawl ve ta…
