Alien franchise film pariatna ‘Alien: Romulus’ chuan tun weekend kalta khan North America-ah cinema hall ticket hralhna atangin dollar maktaduai 45.1 a la lut a, North American box office No.1 niin, Deadpool & Wolverine rorelna a rawn titawp ta.
Alien franchise hi 1979-a Ridley Scott film siam ‘Alien’ atanga intanin, 1986-ah a chhunzawmna James Cameron siam ‘Aliens’ te pawh kan lo hmu taw a, Ridley Scott hi Alien: Romulus producer a ni nge nghe. he film-ah hian Cailee Spaeny, David Jonsson, Archie Renaus, Isabella Merced leh Spike Fearn te an chang a, colonist rual khat space stationa kal ten alien an tawn dan vel tarlanna a ni.
Alien: Romulus hi US pawn lamah pawh a chetha thawkhat a, dollar maktaduai 66.7 la lut theiin, tihian opening weekend-a a lak luh zawng zawng chu dollar maktaduai 108.2 a tling.
Deadpool & Wolverine pawh a la kaltluang viau tho a, dollar maktaduai 29 la lut lehin, kar thum North American box office-a a No.1 hnuah No.2-ah a tawlh ve ta. He film hian kar li chhungin US-ah dollar maktaduai 545.9 la lut tawin, US pawnah dollar maktaduai 596.8 a la lut taw bawk a, tihian a vaiin dollar tluklehdingawn 1.142 la lut tawhin, Marvel film tlangzarh tawh zinga sum la lut tam pakuana a ni.
Colleen Hoover best-selling novel behchhana an chan ‘It Ends With Us’, Blake Lively channa pawhin a weekend vawi hnihnaah dollar maktaduai 24 la lut lehin No.2 atangin No.3-ah a tawlh a, he film pawh hian kar hnih chhungin US-ah dollar maktaduai 100 dawn a la lut ve hman taw bawk.
Box office-a No.1 pawh lo ni tawh Twisters-in dollar maktaduai 9.8 la lut lehin No.4 a ni a, he film hian US-ah dollar maktaduai 238.4 la lut tawin, US pawna a lak luh nen chuan dollar maktaduai 333.4 a tlin ve der tawh bawk.
Film tlangzarh thar ‘Coraline’-in dollar maktaduai 8.9 la lutin No.5 a ni a, he film hi Ningani kaltaa tlangzarh kha niin, Ningani ticket hralhna nen chuan dollar maktaduai 11.3 a la lut tling ve tawh bawk.
Bollywood film ‘Stree 2’ pawh a chetha viau a, dollar maktaduai 2.184 la lutin, No.10 a ni. He Hindi horror-comedy hi India-ah pawh a chetha viau a, Shraddha Kapoor channa niin, cheng vaibelchhe 50 vel senga siam niin, India-ah pawh cheng vaibelchhe 142 a la lut tawh. Stree 2 hian opening day-ah India-ah cheng vaibelchhe 83.48 a la lut thei a, kumina Hindi film tlangzarhah chuan opening day-a la lut hnem ber a la ni a, kumin chauh ni lo, Hindi film tlangzarh tawh zawng zawngah pawh opening day-a India-a sum la lut tam pahnihna a ni pha a, 2023-a tlangzarh ‘Jawan’ chiah a pha lo.
Box office Top 10:
1 Alien: Romulus $41,500,000
2 Deadpool & Wolverine $29,000,000
3 It Ends With Us $24,000,000
4 Twisters $9,800,000
5 Coraline $8,391,479
6 Despicable Me 4 $6,000,000
7 Trap $3,435,000
8 Inside Out 2 $3,200,000
9 Borderlands $2,350,000
10 Stree 2 $2,184,000
Box office-ah Alien: Romulus a No.1
