Box office-ah ‘Avatar 3’-in $1.3B a la lut tling
‘Zootopia 2’-in record a siam
Avatar film pathumna ‘Avatar: Fire and Ash’ chuan tun weekend kalta khan US-ah cinema hall ticket hralhna atangin dollar maktaduai 13.32 la lut lehin, North American box office No.1 a ni a, kar nga chhung a No.1 tling ta. He film hian US-ah ringawt dollar maktaduai 353.4 la lut tawhin, US pawna a lak luh nen chuan dollar tluklehdingawn 1.3 a tling ta a ni.
Film tlangzarh thar ‘28 Years Later: The Bone Temple’-in beisei a pha lo a, dollar maktaduai 13 la lutin, No.2-ah a debut. ‘28 Years’ film hmasa zawk, nikum June thlaa an tlangzarh khan opening weekend-ah dollar maktaduai 30 a la lut thei a, a chhunzawmna hian beisei a pha ta lo deuh a ni. He film hi a pathumna pawh an la siam leh dawn a, mahse, a film pahnihna chet that vak loh avangin engtin nge an kalpui dawn a chiangta rih lo a ni.
‘28 Years Later: The Bone Temple’ hi Hollywood star Ralph Fiennes, Jack O’Connell, Alfie Williams, Erin Kellyman leh Chi Lewis-Parry te channa niin, a film pathumna-ah hi chuan ‘28 Days Later’ star Cillian Murphy a inlan ve thung ang.
Disney Animation tihchuah, animated movie ‘Zootopia 2’-in dollar maktaduai 8.7 la lut lehin No.3 a la ni a, he film hian khawvel huapin dollar tluklehdingawn 1.313 a la lut tling ta a, Pixar animated movie ‘Inside Out 2’ lehpelin, animated movie tlangzarh tawh zinga sum la lut hnem ber a ni ta a ni. ‘Zootopia 2’ hi animated film chauh ni lo, film tlangzarh tawh zawng zawng zingah pawh sum lak luh tama pakuana a ni pha bawk.
‘The Housemaid’-in weekend vawi nganaah dollar maktaduai 8.5 la lut lehin No.4 a la ni a, he film hian US-ah dollar maktaduai 108.7 a la lut tling ta.
Timothee Chalamet channa ‘Marty Supreme’ chuan dollar maktaduai 5.4 la lut lehin No.5 a ni a, US-ah dollar maktaduai 80 a la lut tling ta. ‘Marty Supreme’ hi table tennis champion hlui pakhat chanchin behchhana chan a ni a, he film avang hian Timothee Chalamet hian kar kalta-a Golden Globe Award an semah khan best actor a dawng a, hei vang hian cinema hall lamah pawh ticket hralh a tipung ve leh deuh a ni.
Box office top 10:
1 Avatar: Fire and Ash $13,320,000
2 28 Years Later: The Bone Temple $13,000,000
3 Zootopia 2 $8,769,000
4 The Housemaid $8,515,000
5 Marty Supreme $5,477,927
6 Primate $5,000,000
7 Greenland 2: Migration $3,365,000
8 Anaconda $3,200,000
9 The SpongeBob Movie: Search for Squarepants $2,315,000
10 No Other Choice $2,237,000
Box office-ah ‘Avatar 3’-in $1.3B a la lut tling ‘Zootopia 2’-in record a siam
