Box office-ah ‘Beetlejuice’ a la chungnung ber
Film tlangzarh thar ‘Transformers One’-in a beisei a pha lo deuh a, box office No.1 ni thei tura an ngaih laiin, horror-comedy Beetlejuice Beetlejuice bawk a No.1 leh ta a, North American box-a a zawna kar thum a No.1-na a ni ta.
‘Beetlejuice Beetlejuice’ hian tun weekend kalta khan US-ah cinema hall ticket hralhna atangin dollar maktaduai 26 la lut lehin, a kar thum nan box office-ah a No.1 leh ta a, he film hian US-ah dollar maktaduai 226.8 a la lut tling tawh a, US pawna dollar maktaduai 103 a lak luh tawh nen, khawvel huapin dollar maktaduai 329.7 a la lut tling ta a ni.
Transformers One hi opening weekend-ah dollar maktaduai 35 vel la lut thei turin an chhutnain, dollar maktaduai 25 la lutin, No.2-ah a debut. He CGI-animated film hi Transformers palian pahnih Optimus Prime leh Megatron te chanchin tarlanna niin, thiantha atanga an inhmelmak dan vel te tarlan a ni a, Chris Hemsworth leh Brian Tyree Henry te an aw an thawh a, Keegan-Michael Key, Scarlett Johansson, Steve Buscemi, Laurence Fishburne leh Jon Hamm te pawhin an aw an thawh.
He film hi dollar maktaduai 75 (marketing tel loin) senga siam a ni a, US pawnah dollar maktaduai 14 la lut bawkin, khawvel huapa opening weekend-a a lak luh zawng zawng hi dollar maktaduai 39 a ni a, a film siam nana an sum sen hi marketing nen chuan dollar maktaduai 100 a chuang daih dawn a, an sum sen zat hmuhchhuah hi a huphurhawm ru ta riau.
Horror-thriller ‘Speak No Evil’-in dollar maktaduai 5.9 la lut lehin No.3 a ni a, he film hian kar hnih chhungin US-ah dollar maktaduai 21.5a la lut tling ta a, US pawnah maktaduai 20.9 a la lut tawh bawk a, a vaiin dollar maktaduai 42.4 a tlin tawh a, a film siam nan hian dollar maktaduai 15 chiah an seng thung.
Film tlangzarh thar Halle Berry channa ‘Never Let It Go’-in dollar maktaduai 4.5 la lutin No.4 a ni a, Demi Moore canna ‘The Substance’-in dollar maktaduai 3.1 la lutin No.6 a ni bawk.
Deadpool & Wolverine chu top 5 khartu niin, dollar maktaduai 3.9 la lut lehin No.5 a la ni a, he film hian kar 9 chhungin US-ah maktduai 627.3 la lut tawhin, US pawna a lak luh nen chuan dollar tluklehdingawn 1.316 a tling tawh a, khawvela film tlangzarh tawh, sum la lut tam 23-na a ni tawh.
Box office top 10:
1 Beetlejuice Beetlejuice $26,000,000
2 Transformers One $25,000,000
3 Speak No Evil $5,900,000
4 Never Let Go $4,500,000
5 Deadpool & Wolverine $3,900,000
6 The Substance $3,100,000
7 Am I Racist? $2,536,000
8 Reagan $1,666,659
9 Jung Kook: I Am Still $1,425,748
10 Alien: Romulus $1,326,000
Box office-ah ‘Beetlejuice’ a la chungnung ber
