Box office-ah ‘Den of Thieves 2’ a No.1
Los Angeles-a kangmei chhuak avangin an khawnawtin an buai mup mup nain, hei hian cinema ticket hralh chuti takin a nghawng na lutuk lo a nih hmel a, hetiang karah hian Gerard Butler channa ‘Den of Thieves 2: Pantera’ chuan US-ah cinema hall ticket hralhna atangin dollar maktaduai 15.5 la lutin North American box office No.1 a ni a, ‘Den of Thieves 2’ hi beisei aiin a che tha tlat.
He film hian mipa lam a hit lehzual a, Tucker Tooley produce niin, thla eng emaw zat hnuah Lionsgate film box office-a a No.1 lehna hmasa ber a ni a, Den of Thieves film hmasa zawk, 2018-a an tlangzarh nen an chet that dan pawh a inzul tawk vel viau a ni.
Los Angeles kangmei chhuak avangin an buai mup mup a, mahse, hei hian cinema hall lam a nghawng na lutuk lo a nih hmel a. Los Angeles hi US-ah pawh market lian ber a ni a, kangmei rapthlak tak an tuar mek nain US-a cinema hall hrang hrangah sum la lut tam ber an la ni tho mai.
Film tlangzarh thar Robbie Williams biopic ‘Better Man’ a che chhe riau a, he British film hian tun weekend kalta khan cinema hall ticket hralhna atangin dollar maktaduai 1.1 chiah a la lut thei a, box office top 10-ah pawh a lang pha lo. A film siam nan hian dollar maktaduai 100 chuang an seng lehnghal!
Hetihlai hian Golden Globes winner The Brutalist-in a award dawn hlawkpuiin, cinema hall lamah a rak thar leh deuh a, dollar maktaduai 1.3 la lut lehin No.9 a la ni pha.
Disney film ‘Mufasa: The Lion King’-in dollar maktaduai 13.2 la lut lehin No.2 a la ni a, he film hian khawvel huapin dollar maktaduai 540 a la lut tling tawh. Disney film dang ‘Moana 2’ pawhin dollar maktaduai 6.5 la lut lehin No.5 a la ni a, he animated movie hian khawvel huapin dollar maktaduai 989.8 a la lut tling tawh a, dollar tluklehdingawn chu a la lut thei ngei dawn e.
Sonic the Hedgehog 3 pawhin dollar maktaduai 11 la lut lehin No.3 a la ni a, khawvel huapin dollar maktaduai 394 a la lut tling ve ta a, vampire film ‘Nosferatu’-in dollar maktaduai 6.8 la lut lehin No.4 a la ni a, he film pawh hian kar hnih chhungin khawvel huapin dollar maktaduai 135.8 a la lut tling ve ta bawk.
Hollywood Box Office Top 10:
1 Den of Thieves 2: Pantera $15,500,000
2 Mufasa: The Lion King $13,200,000
3 Sonic the Hedgehog 3 $11,000,000
4 Nosferatu $6,800,000
5 Moana 2 $6,500,000
6 A Complete Unknown $5,000,000
7 Wicked $5,000,000
8 Babygirl $3,098,318
9 The Brutalist $1,387,740
10 Gladiator II $1,200,000
Box office-ah ‘Den of Thieves 2’ a No.1
