Box office-ah ‘Exorcist’ a No.1
Horror movie ‘The Exorcist: Believer’ chuan tun weekend kalta khan North America-ah cinema hall ticket hralhna atangin dollar maktaduai 27.2 a la lut a, box office No.1 a ni. He film hi 1973 horror movie hriat hlawh tak Linda Blair leh Ellen Burstyn te channa ‘Exorcist’ zul zuia chan a ni a, opening weekend sum lak luhah erawh beisei a pha chiah lo.
‘The Exorcist: Believer’ hian US pawn lamah, ram hrang hrang 40 atangin dollar maktaduai 17.9 a la lut bawk a, tihian opening weekend a lak luh zawng zawng chu dollar maktaduai 45.1 a tling.
David Gordon Green-a direct, he horror movie hi Exorcist film hmasa ber cinema hall-a an tlangzarh atanga kum 50-naah an thar thawh leh a ni a, kha movie khan dollar maktaduai 450 a la lut thei a, a hunlaia horror movie-ah chuan sum la lut hnem ber niin, a film hi William Friedkin direct niin, William Peter Blatty lehkhabu ziah behchhana chan a ni.
The Exorcist: Believer hi tun weekend lo awm tura tlangzarh an tum zawk a ni a, mahse, Taylor Swift concert movie October ni 13-ah an tlangzarh dawn tih an ouan hnuah Exorcist movie tlangzarh hun hi kar khatin an sawn hma ta a ni.
Exorcist movie hi a franchise-a a film palina a ni tawh a, a film pahnihna leh pathumna te chuan beisei an pha lo hle a, a original movie 1973-a tlangzarh bak chuan thawm lian a nei pha lem lo. Tuna an tlangzarh thar leh takah hian 1973 origina movie-a changtu Chris MacNeil chuan a role ngai a chang leh a, Victor Fielding (Leslie Odom Jr.) fanu (Lidya Jewett) leh a thianna (Olivia Marcum) te khawchhunga ramhnuai hnawhchhuah dan vel tarlanna a ni.
PAW Patrol: The Mighty Movie-in an tlangzarh atanga weekend vawi hnihnaah dollar maktaduai 12 lalut lehin, No.1 atangin No.2-ah a tawlh a, he film hian ni 10 chhungin US-ah dollar maktaduai 38.9 a lalut tawh a, US pawna a lak luh nen chuan dollar maktaduai 87.1 a tlin der tawh. He film hi dollar maktaduai 30 senga siam a ni.
Saw X pawhin dollar maktaduai 8.2 la lut lehin No.3 a la ni a, he film hian ni 10 chhungin US leh ram dang atangin dollar maktaduai 32.5 a tlin ve tawh bawk. Saw X movie hi dollar maktaduai 13 chau senga siam a ni.
Hollywood Box Office Top 10 ($ in million):
1. The Exorcist: Believer- $27.2
2. PAW Patrol: The Mighty Movie – $12
3. Saw X. – $8.2
4. The Creator – $6.1
5. The Blind – $4
6. A Haunting in Venice – $2.7
7. The Nun II – $2.6
8. Dumb Money – $2.2
9. The Equalizer 3 – $1.8
10. Hocus Pocus – $1.5