Box office-ah ‘Final Destination Bloodlines’ a No.1
Supernatural horror movie ‘Final Destination: Bloodlines’ chu North American box office No.1 a ni a, The Weeknd companion movie ‘Hurry Up Tomorrow’ chu top 10-a a lang bawk. Box office ranking hi weekend (Zirtawpni – Pathianni) chhunga US-a cinema hall ticket hralhna sum chevel atanga tehin ranking siam thin a ni.
‘Final Destination: Bloodlines’ hian tun weekend kalta khan US-ah cinema hall ticket hralhna atangin dollar maktaduai 51 la lutin, No.1 a ni a, US pawna a lak luh nen chuan dollar maktaduai 102 a tlin nghal der tawh a ni. Final Destination hi film an siam hnem tawh viau a ‘Bloodlines’ hi a parukna a ni a, ‘Final Destination 5’ kha 2011-a tlangzarh niin, kum 14 hnuah a film dang an tichhuak leh ta a ni.
‘Bloodlines’ hi Adam Stein leh Zach Lipovsky te direct niin, Kaitlyn Santa Juana chu hmeichhe pakhat a pi-in thihna a pumpelh thei tih leh mitam tak nunna a chhanhim tawh tih a hriatchhuah dan leh an chunga thil thleng tur pumpelh an tum dan vel tarlanna a ni.
Superhero lar lo deuh zawk te a huhoa an lanna ‘Thunderbolt*’-in dollar maktaduai 16.5 la lut lehin No.1 atangin No.2-ah a tawlh a, he superhero movie hian kar thum chhungin US-ah dollar maktaduai 155 a la lut tling tawh a, US pawna a lak luh nen chuan dollar maktaduai 325.7 a tling ta.
‘Sinners’ pawhin dollar maktaduai 15.4 la lut lehin No.3 a la ni a, tihian US-ah dollar maktaduai 240 la lut tling tawhin, US pawna a lak luh nen chuan dollar maktaduai 316.8 a tling ta bawk.
A Minecraft Movie paw a la kaltluang viau a, dollar maktaduai 5.8 la lut lehin No.4 a la ni a, he film hian kar sarih chhungin US-ah dollar maktaduai 416.6 la lut tawhin, US pawna a lak luh nen chuan dollar maktaduai 928 a tling tawh a, kumina film tlangzarhah chuan sum la lut tam ber a la ni.
Ben Afflect channa The Accountant-in dollar maktaduai 4.9 la lut lehin No.5 a la ni a, he film hian kar li chhungin US dollar maktaduai 60 a la lut tling tawh.
Abel Tesfaye aka The Weeknd channa musical psychological thriller ‘Hurry Up Tomorrow’ -in dollar maktaduai 3.3 la lutin, No.6 a ni a. He film hi a studio album ‘Hurry Up Tomorrow’ companion movie a ni a, he film-ah hian Jenna Ortega leh Barry Keoghan te pawh an inlan a, Trey Edward Shults direct a ni.
Box office top 10:
1 Final Destination: Bloodlines $51,000,000
2 Thunderbolts* $16,536,000
3 Sinners $15,425,000
4 A Minecraft Movie $5,870,000
5 The Accountant 2 $4,959,111
6 Hurry Up Tomorrow $3,300,000
7 Friendship $1,400,280
8 Clown in a Cornfield $1,333,000
9 Until Dawn $800,000
10 The Amateur $712,000
Box office-ah ‘Final Destination Bloodlines’ a No.1
