‘Ghostbusters: Frozen Empire’ chuan tun weekend kalta khan North America-ah cinema hall ticket hralhna atangin dollar maktaduai 45.2 lalutin, North American box office No.1 a ni.
He film thar hi beisei aiin a che tha lo zawk a, 2021-a ‘Ghostbusters: Afterlife’ an tlangzarh pawh khan Covid boruak a awm nain dollar maktaduai 44 opening weekend-ah a lalut thei a, ‘Afterlife’ kha dollar maktaduai 75 vel senga siam a nih laiin, ‘Frozen Empire’ hi chu dollar maktaduai 100 chuang senga siam a ni thung.
He film hian US pawn lam, ram hrang hrang 25 atangin dollar maktaduai 16.4 a lalut bawk a, tihian opening weekend a a lakluh zawng zawng chu dollar maktaduai 61.6 a tling. He film-ah hian a original 1980s film changtu te pawh an la tel nual a, Paul Rudd, Carrie Coon, Finn Wolfhard, Mckenna Grace, Celeste O’Connor, Logan Kim, Bill Murray, Dan Aykroyd, Ernie Hudson, Annie Potts leh William Atherton te pawh an inlan leh a, Kumail Nanjiani leh Patton Oswalt te an inlan thar bawk.
‘Dune Part 2’-in a kar linaah dollar maktaduai 17.6 lalut lehin No.2 a ni a, he film hian US-ah dollar maktaduai 233 lalut tling tawhin, US pawnah dollar maktaduai 341 a lalut tawh bawk a, tihian a vaiin dollar maktaduai 574 a tlin ve ta.
‘Kung Fu Panda’ pawhin a kar thumnaah dollar maktaduai 16.5 lalut lehin No.3 a la ni a, he film pawh hian US-ah dollar maktaduai 133.2 lalut tawhin, US pawna a lakluh nen chuan dollar maktaduai 268.2 a tlin ve ta bawk.
Horror movie tlangzarh thar, Sydney Sweeney channa ‘Immaculate’-in dollar maktaduai 5 lalutin box office No.4 a ni. He film-ah hian Sweeney chu hmeichhe sakhaw rawngbawltu, nun pakhat, Italian thingtlang khaw kilkhawr deuha convent-a awm tura kalin thil hlauhawm tak tak a tawn tak dan vel tarlanna a ni.
Mark Wahlberg channa ‘Arthur the King’-in dollar maktaduai 4.5 lalut lehin No.5 a ni a, he film hian ni 10 chhungin US-ah dollar maktaduai 14.3 a lalut ve ta bawk.
Box office top 10:
1 Ghostbusters: Frozen Empire $45,200,000
2 Dune: Part Two $17,600,000
3 Kung Fu Panda 4 $16,800,000
4 Immaculate $5,360,000
5 Arthur the King $4,360,000
6 Late Night with the Devil $2,833,419
7 Imaginary $2,800,000
8 Love Lies Bleeding $1,586,476
9 Cabrini $1,428,474
10 Bob Marley: One Love $1,100,000
Box office-ah ‘Ghostbusters: Frozen Empire’ a No.1
