Box office-ah ‘Hoppers’ a No.1
‘Hoppers’ chu tun weekend kalta khan US-ah cinema hall ticket hralhna atangin dollar maktaduai 46 la lutin, box office No.1 a ni a, US pawn, ram hrang hrang 88 atangin dollar maktaduai 42 la lut bawkin, tihian opening weekend-a a lakluh zawng zawng chu maktaduai 88 a tling.
‘Hoppers’ hi comedy-adventure film niin, ran hmangaihtu Mabel (Piper Curda) chuan technology thar a hmanga a robotic beaver (beaver- sazu lian chi ti mai ila)-ah a intichang thei a, ramsa te nena inbiak theihna a nei ta thin a, chuta tang chuan thil chi hrang hrang suangtuahna ramah pawh a la manphan ngai loh te a hriatchhuah phah ta a. Mabel-i chu beaver pakhat King George (Bobby Moynihan) nen an inthiantha ta hle mai a, mihring te chhanhim turin ramsa khawvelah theihtawp a chhuah a tul tak dan vel tarlanna a ni.
Scream 7-in dollar maktaduai 17.3 la lut lehin No.1 atangin No.2-ah a tawlh a, tihian US-ah dollar maktaduai 81.1 la lut tawhin, US pawna a lak luh nen chuan maktaduai 150 a tlin tawh.
Film tlangzarh thar Maggie Gyllenhaal film direct pahnihna, Jessie Buckley leh Christian Bale te channa ‘The Bride!’ chuan opening weekend-ah dollar maktaduai 7.26 la lutin, No.3-ah a debut, US pawn, ram hrang hrang 78 atangin dollar maktaduai 13 a la lut thei bawk a, tihian opening weekend-ah dollar 20 awrh chau a a lut a, he film hi marketing tel loin a siam nan dollar maktaduai 80 an seng a, a hmalam hun a êng lutuk lo deuh tlat.
GOAT a la kal tluang viau a, dollar maktaduai 6.6 la lut lehin No.4 a la ni a, he film hian US-ah dollar maktaduai 83.8 la lut tawhin, US pawna a lak luh nen chuan maktaduai 141.3 a tlin tawh a, Wuthering Heights pawhin maktaduai 3.75 la lut lehin, top 5 khartu-ah a la tang a, tihian US pawna a lak luh nen maktaduai 213.87 a tlin ve tawh bawk.
Box office top 10:
Hoppers $46,000,000
Scream 7 $17,300,000
The Bride! $7,260,000
GOAT $6,600,000
Wuthering Heights $3,750,000
Crime 101 $2,066,759
Send Help $1,600,000
I Can Only Imagine 2 $1,525,000
EPiC: Elvis Presley In Concert $1,523,800
Demon Slayer: Kimetsu No Yaiba Infinity Castle $1,300,000
Box office-ah ‘Hoppers’ a No.1
