Box office-ah ‘Kingdom of the Planet of the Apes’ a No.1
‘Kingdom of the Planet of the Apes’-in tun weekend kalta khan North America-ah cinema hall ticket hralhna atangin dollar maktaduai 56.5 a lalut a, box office No.1 a ni. He film hian US pawnah dollar maktaduai 72.5 lalut bawkin, a vaiin dollar maktaduai 129 a lalut thei a, a che chhe hran lo e.
Nipui a thaw dawn tan a, chutihlaiin beisei angin cinema hall sum che vel a pung hleithei lova, ‘Kingdom of the Planet of the Apes’ hian cinema hall lam pawh a rawn chhem nung thar ve leh deuh ngeiin a rinawm. ‘Kingdom’ hi mipa lamin an en nasa deuh a, a rebooted series film palina a ni tawh a, a film hmasa ber ‘Rise of the Planet of the Apes’ chu 2011-a tlangzarh kha a ni. Tuna a film thar hi dollar maktaduai 160 vel (marketing tel lovin) senga siam a ni.
Planet of the Apes film hnuhnung ber, 2017-a an tlangzarh ‘War of the Planet of the Apes’ khan opening weekend-ah US-ah dollar maktaduai 56.3 a lalut theia, 2014-a ‘Dawn of the Planet of the Apes’ khan opening weekend-ah dollar maktaduai 72.6 lalut theiin, 2011-a a origunal film ‘Rise of the Planet of the Apes’ khan opening weekend-ah dollar maktaduai 54.3 a lalut thei bawk.
Owen Teague, Freya Allan, Kevin Durand leh William H. Macy te channa ‘Kingdom’ hi 2017-a tlangzarh ‘War of the Planet of the Apes’ atanga kum 300 hnua thil thleng anga chan a ni.
The Fall Guy-in dollar maktaduai 13.7 lalut lehin No.2-ah a tawlh a, he film hian ni 10 chhungin US-ah dollar maktaduai 49.7 a lalut tling ta a, US pawnah, ram hrang hrang 80 atangin dollar maktaudia 9.4 lalut lehin, tihian US pawna a lakluh hi dollar maktaduai 54 a tling ta a, ni 10 chunga a lakluh zawng zawng chu dollar maktaduai 103.7 a tling ta.
Zendaya channa ‘Challengers’ pawhin a weekend vawi thumnaah dollar maktaduai 4.7 lalut lehin No.3 a la ni a, he film hian kar thum chhungin US-ah dollar maktaduai 38.4 a lalut tling ta a, US pawnah, ram hrang hrang 63 atangin dollar maktaduai 30.6 lalut tawhin, a vaiin dollar maktaduai 69 a lalut tling ve ta bawk.
‘Tarot’-in a weekend vawi hnihnaah dollar maktaduai 3.4 lalutin, No.4 a la ni a, he film pawh hian ni 10 chhungin US-ah dollar maktaduai 12 a lalut ta a, US pawn ami nen chuan dollar maktaduai 20.2 a tlin ve ta bawk.
Godzilla x Kong: The New Empire-in maktaduai 2.6 lalut lehin No.5 a la ni a, he film hian US-ah maktaduai 190 a lalut tling ta bawk.
Box office top 10:
1 Kingdom of the Planet of the Apes $56,500,000
2 The Fall Guy $13,700,000
3 Challengers $4,684,276
4 Tarot $3,450,000
5 Godzilla x Kong: The New Empire $2,525,000
6 Unsung Hero $2,250,000
7 Kung Fu Panda 4 $2,000,000
8 Civil War $1,804,642
9 Star Wars Ep. I: The Phantom Menace $1,500,000
10 Abigail $1,100,000
Box office-ah ‘Kingdom of the Planet of the Apes’ a No.1
![](https://theaizawlpost.org/wp-content/uploads/Clipboard01-949.jpg)