Box office-ah ‘The Devil Wears Prasa 2’ a la No.1
‘The Devil Wears Prada 2’ chuan tun weekend kalta khan North America-ah cinema hall ticket hralhna atangin dollar maktaduai 43 la lut lehin, a kar hnih nan box office No.1 a ni. Hetihrual hian Mortal Kombat II pawh a rawn chetha viau a, No.2-ah a debut. Box office ranking hi weekend (Zirtawpni – Pathianni) chhunga US-a cinema hall ticket hralhna sum vel atanga teha siam thin a ni.
‘Prada’ film hian a weekend vawi hnihnaa ticket hralhna atangin US-ah dollar maktaduai 43 la lut lehin, US pawnah dollar maktaduai 75.8 a la lut leh bawk a, tihian kar hnih chhunga khawvel huapa a lak luh chu dollar maktaduai 433.2 a tling der tawh. Tihi chuan a film hmasa zawk sum lak luh a rawn khum der tawh a, a film hmasa zawk ‘The Devil Wears Prada’ khan dollar maktaduai 326 a la lut thei.
‘Mortal Kombat II’ a rawn che chhe vak lo a, opening weekend-ah dollar maktaduai 40 la lutin No.2-ah a debut a, US pawnah dollar maktaduai 23 a la lut bawk a, tihian khawvel huapin opening weekend-ah dollar maktaduai 63 a la lut thei a ni.
2021 khan a film hmas zawk ‘Mortal Kombat’ an tlangzarh kha a ni a, ‘MK II’ hi a film hmasa zawk aiin a rawn chetha nghal a ni.A script hi Jeremy Slater leh Karl Urban te kut a ni a, a franchise favorite Johnny Cage chu ‘90s action star, Earthrealm hmalam hun hril thei tur tournament a tel tura an hnuh luh dan vel tarlanna a ni.
Michael Jackson biopic ‘Michael’ pawh a la kaltluang viau a, a weekend vawi thumnaah dollar maktaduai 36.5 la lut lehin, tihian kar thum chhungin US-ah dollar maktaduai 240.5 ala lut tling tawh a, US pawna a lakluh nen chuan dollar maktaduai 577.4 a tlin der tawh. ‘Michael’ hian Bohemian Rhapsody-in US-a dollar maktaduai 216.7 a lak luh chu lehpelin, biopic tlangzarh tawhah chuan North America-a cinema hall ticket hralhna atanga sum la lut hnem ber a la ni.
Family friendly film, The Sheep Detectives-in dollar maktaduai 15.9 la lutin, No.4-ah a debut. He comedy-mystery film-ah hian beram rual khatin anmahni enkawltu, beramvengtu (Hugh Jackman) thih dan chhui chhuah an tum dan vel tarlan a ni.
Concert film an tlangzarh thar ‘Billie Eilis – Hit Me Hard and Soft: The Tour (Live in 3D)’ chuan opening weekend-ah dollar maktaduai 7.5 la lutin, No.5-ah a debut a, US pawna dollar maktaduai 12.6 la lut bawkin, a vaiin maktaduai 20.1 a tlin thei. He concert film hi James Cameron leh Billie Eilish te direct dun a ni.
Box office top 10:
1 The Devil Wears Prada 2 $43,000,000
2 Mortal Kombat II $40,000,000
3 Michael $36,500,000
4 The Sheep Detectives $15,916,000
5 Billie Eilish – Hit Me Hard and Soft: The Tour (Live in 3D) $7,500,000
6 Super Mario Galaxy Movie, The $6,600,000
7 Project Hail Mary $6,069,868
8 Hokum $3,303,615
9 Deep Water $780,274
10 Animal Farm $663,624
Box office-ah ‘The Devil Wears Prasa 2’ a la No.1
