The Odyssey chuan tun weekend kalta khan North America-ah cinema hall ticket hralhna atangin dollar maktaduai 87 la lutin, a kar hnih nan box office No.1 a ni. He film hi ‘R’ rated-ah chuah weekend vawi hnihnaa sum la lut tam ber dawttu a rawn ni thei a, 2024-a ‘Deadpool & Wolverine’ weekend vawi hnihna sum lak luh, dollar maktaduai 97 chiah a pha lo. He film hian opening weekend-ah dollar maktaduai 123.5 la lutin, No.1 a ni a, a weekend vawi hnihnaah ticket hralhna 30%-in tlahniam mah se No.1 a la ni pha tho a ni.
Box office ranking hi kartawp (Zirtawpni – Pathanni) chunga North America-a cinema hall ticket hralhna sum chevel atangin tehin siam thin a ni.
‘The Odyssey’ hian ni 10 chhungin US-ah dollar maktaduai 286.4 a la lut tling tawh a, US pawna a lak luh nen chuan dollar maktaduai 639.9 a tlin tawh bawk.
Tun weekend kalta khan film tlangzarh thar lian tham a awm lo a, chuvangin box office top 10 pawh a danglam lutuk lo. Hetihrual hian ‘Toy Story 5’-in US-ah dollar maktaduai 10.5 la lut lehin, No.3 a la ni a, he film hian khawvel huapin dollar tluklehdingawn a la lut tling ta.
Dollar maktaduai tling lo (dollar 7,50,000) chauh senga siam ‘Obsession’-in dollar maktaduai 1.5 la lut lehin No.10 a la ni a, he film hian US-ah dollar maktaduai 261.3 la lut tawhin, khawvel huapin dollar maktaduai 458.3 a la lut tling tawh bawk.
Box Office Top 10:
1 The Odyssey $87,000,000
2 Moana $10,500,000
3 Toy Story 5 $10,000,000
4 Hadestown: The Musical $9,692,712
5 Minions & Monsters $9,600,000
6 The Invite $2,636,270
7 Evil Dead Burn $2,610,000
8 Young Washington $1,991,286
9 Motor City $1,625,000
10 Obsession $1,500,000
Box office-ah ‘The Odyssey’ a la No.1
