‘Wonka’ chuan tun weekend kalta North America-ah cinema hall ticket hralhna atangin dollar maktaduai 14.4 lalut lehin North American box office No.1 a la ni a, kar thum chhung chu a zawnin a No.1 ta.
Timothee Chalamet chenna, he musical hian kar thum chhungin North America-ah cinema hall ticket hralhna atangin dollar maktaduai 165 a lalut tling tawh, US pawnah, ram hrang hrang 77 atangin dollar maktaduai 301.2 lalut tawh bawkin, a vaiin dollar maktaduai 466 a tlin ta.
Horror movie ‘Night Swim’ chuan dollar maktaduai 12 a lalut a, box office No.2 a ni a, US pawnah dollar maktaduai 5.7 lalut bawkin, tihian opening weekend-a a lakluh chu dollar maktaduai 17.7 a tling. He film hi marketing tel loin, dollar maktaduai 15 vel chauh senga siam a ni.
He film hi horror movie siam lama hming chher tawh Jason Blum produce a ni a, kumina film lian tham deuh hleka tlangzarh hmasak ber a ni a, Bryce McGuire direct niin, 2014-a a lo tlangzarh tawh film tawi chi, film puitlinga a siam tharleh a ni a, hmeichhe naupang pakhat an kawmchar swimming pool a lawng lem danglam tak chhar tuma vanduaina tawk tain bul an tan a, chutah baseball player pakhat, a nupuiin multiple sclerosis a neih avanga a baseball career chawlhsan tul ta chanchinin a chhunzawm a. He film-ah hian Wyatt Russell, Kerry Condon, Amelie Hoeferle leh Gavin Warren ten role pawimawh an chang.
Box office top 10 ($ in million):
1. Wonka– $14.4
2. Night Swim – $12
3. Aquaman and the Lost Kingdom – $10.6
4. Migration – $10.2
5. Anyone But You– $9.5
6. The Boys in the Boat- $6
7. The Color Purple – $4.7
8. The Iron Claw – $3.9
9. Ferrari– $2.5
10. Poor Things– $2
Box office-ah Wonka’ a la No.1
