Box office-ah ‘Wonka’ a No.1

Box office-ah ‘Wonka’ a No.1
Timothee Chalamet channa ‘Wonka’ chuan tun weekend kalta khan North America-ah cinema hall ticket hralhna atangin dollar maktaduai 39 lalutin North American box office No.1 a ni a, US pawnah, ram hrang hrang 77 atangin dollar maktaduai 53.6 a lalut thei bawk a, tihian opening weekend a khawvel huapa a lakluh chu dollar maktaduai 92.6 a tling a, England leh Australia bakah ram thenkhatah chuan a kar hnih chhuahna a ni tawh a, chunga a lakluh te nen chuan dollar maktaduai 151.4 a tling tawh a ni.
Paul King direct Wonka film-ah hian Chalamet chu Willy Wonka lemah a chang a, Hugh Grant, Olivia Colman, Keegan-Michael Key, Calah Lane, Paterson Joseph, Matt Lucas, Mathew Baynton, Sally Hawkins, Rowan Atkinson, Natasha Rothwell, Rich Fulcher, Rakhee Thakrar, Tom Davis leh Kobna Holdbrook-Smith te pawh an inlan.
The Hunger Games: The Ballad of Songbirds & Snakes-in dollar maktaduai 5.8 lalut lehin, No.2 a la ni a, he film hian kar nga chhungin US-ah dollar maktaduai 145.2 lalut tawhin US pawnah maktaduai 155.3 a lalut tawh bawk a, tihian kar nga chhungin dollar maktaduai 300.5 a tlin der tawh a ni.
Japanese anime ‘The Boy and the Heron’-in dollar maktaduai 5.17 lalut lehin No.1 atangin No.3-ah a tawlh a, he film hian kar hnih chhungin US-ah dollar maktaduai 23.1 a lalut tling ta a, Japanese film dang Godzilla Minus One-in dollar maktaduai 4.5 lalut lehin No.4 a ni a, he film pawh hian US-ah dollar maktaduai 44.3 a lalut tling ve ta bawk.
Trolls Band Together-in dollar maktaduai 4 lalut lehin No.5 a la ni a, Wirh-in dollar maktaduai 3.2 lalut lehin No.6 a ni bawk. Kristian film thar Christmas With the CHosen: Holy Night-in dollar maktaduai 2.9 lalutin No.7-ah a debut ve thung.
‘Napoleon’ pawh top 10-ah a la lang a, dollar maktaduai 2.2 lalut lehin No.8 a la ni a, he film hian US-ah dollar maktaduai 131.4 lalut tawhin, US pawna a lakluh nen chuan maktaduai 200 a hnaih ve ta bawk.
Beyonce concert film ‘Renaissance: A Film By Beyonce’ pawhin a weekend vawi thumnaah dollar maktaduai 2 lalut lehin No.9 a la ni a, he film pawh hian US-ah maktaduai 31 a lalut tling ve ta bawk.
Emma Stone channa ‘Poor Things’-in a weekend vawi hnihnaah dollar maktaduai 1.3 lalut lehin No.10 a ni a, he film hian kar kaltaa Golden Globe Awards nomination an puanah khan nomination pasarih a nei a, Critics Choice Awards nomination-ah 13-ah a lang thei bawk.