May ni 6, 2025 – Thawhlehni khan Mizoram Boxing Association (MIZBA) leh Thlik Thlok Entertainment & Charity Network (Thlik Thlok) chuan Mizorama boxing chawilar zual tur leh boxer te tana hamthatna nasa zawk siam turin thawhhona thuthlung an ziak fel.
He thawhhona avang hian MIZBA in boxing competition a kalpuiah kum sarih chhung chu prize money a awm dawn a. “Hei hian kan boxer te a tihphur a, boxer zingah inelna leh thawhrimna nasa zawk a awm dawn avangin boxing nasa zawkin hma a sawn ka beisei a ni,” tiin MIZBA President Pu C Laltanpuia chuan a sawi a. “Mizoram sorkarin Olympic 2036-a kan thalai tam takte an telna tura a ruahmanna kalpui lai ‘Vision 2036’ tihhlawhtlin tuma ke kan penna kawngah nasa takin a pui dawn a ni. He thawhhona a zawh hunah pawh thawhhona tha zawk kan la neih theih phah dawn a ni,” a ti bawk.
MIZBA leh Thlik Thlok thawhhona avang hian kum sarih chhung MIZBA buatsaih boxing competition-ah prize money awm ang, competition hi Thlik Thlok in a broadcast thin dawn a. Chumai bakah prize money lian tham awmna, MIZBA hnuaia boxer te khelh tur boxing match, a hminga ‘Golden Ring’ an vuah chu kumin August thla atang hian a awm dawn bawk. He thawhhona avang hian Mizoram boxing chuan bung thar kaiin Mizo boxer te tan amateur khel chunga sum tam tham thawhchhuah theihna kawng a inhawng dawn ta a ni.
Boxer te ham \hat nan MIZBA leh Thlik Thlok thawk dun
