Boxer tel phal loh kaihhnawihah Serchhip district-in boxer ko let

Boxer tel phal loh kaihhnawihah
Serchhip district-in boxer ko let
Mizoram Boxing Assn (MIZBA) huaihawtin state huap boxing championship neih a ni a, hetah hian MIZBA hruaitu pakhat laka thubuai thehluhnaa hming lang boxer thenkhat chu telh phal an ni loa, heng zingah hian Serchhip district boxer pathum an tel avangin an lungawiloh zia entirna atan Serchhip District Boxing Association (SEDBA) chuan he championship-a tel an boxer ho an ko let vek dawn.
September 23-26 chhung hian Lunglei SAI Extension Center-a MSSC Golden Jubilee 44th Mizoram State Boxing Championship 2025 neih a ni a. Serchhip district hmeichhe boxer pathum chu an kal vek tawh hnu ah telh tir an ni lo. Hei hi MIZBA hruaitu pakhat, mipat hmeichhiatna lam rawngkaia boxer-te khawih chungchanga POCSO case nei mek thlavang an hauh sakna avang niin SEDBA hian a ngai.
Thudawn danin, MSSC Golden Jubilee 44th Mizoram State Boxing Championship 2025 khel tur hian district hrang hrang atangin boxer 100 chuang an fuankhawm a, Thawhlehni zing khan weight lak an nih laiiin, Aizawl leh Serchhip district atanga hmeichhe boxer kal ve mi pathum chu khelh tir ve remtih a ni lo.
SEDBA hian Thawhlehni chawhma khan emergency meeting koin MIZBA hnenah an hmeichhe boxer pathum hi khelh tir ngei turin ngenna lehkha an thawn nghal a. An ngenna hi Thawhlehni tlai dar 4.00 thlenga a hlawhtling lo a nih chuan an boxer zawng zawng bakah he championship-a an district atanga referee leh judge atana hmante chu vawiin – ZSeptember 24 hian Lunglei atanga hruai haw vek an tum a; State Championship hi boycott zui an tum tih an hriattir.
MIZBA hian hun tiam chhung hian thuthar a nei loa, a dinna ngaiah a ding nia hriat a ni. Hei vang hian SEDBA pawhin a lo sawi lawk tawh angin a kaltlang ve dawn tih a sawi a ni.
Thudawnna sawi danin, kumin July-a6th Junior (U-17) Boys & Girls National Championship khelha Mizoram aiawha kal boxer zingah, an kal chhung leh an kal hma Aizawla an camp laiin an (MIZBA) hotu pakhat chuan mipat hmeichhiatna lam hawi zawngin a khawih fo nia sawiin an nu leh pate nen Child Welfare Committee-ah an zualko a, police case-ah kal zuiin, he thila puh ber hi man a ni a, tunah hian Central Jail-ah a tang mek nia sawi a ni.
He thu kal zelah hian tun tuma State Boxing Championship-ah hian an hotu laka complaint thehlut hmeichhe boxer ho hi MIZBA hotute chuan a hmunah an paih ta niin SEDBA hian a ngai a ni.