Mizoram aiawha chhuak hmeichhe boxer kum la tling lote hursualna lam hawi nia ngaiha khawih vanga thubuaiin a nghawng chhuah, state huap boxing inelnaa heng boxer ho tel ve phalsak an ni lo chuan nghawng a nei zel a, thuneitu lamin he inelna hi titawp lailawk turin a hriattir.
Mizoram State Sports Council (MSSC) secretary chuan Nilaini khan Mizoram Boxing Association (MIZBA) president leh secretary hnenah lehkhaa hriattirin, MIZBA buatsaiha Lunglei a khelh mek MSSC Golden Jubilee 44th Mizoram State Boxing Championship-ah POCSO case-a a tuartu hmeichhe boxer-te khelh ve an phal lo nia puhna chungchangah Child Welfare Committee Aizawl District atanga MSSC-in hriattirna a dawn bawhzuiin, he inpuhna hi thudik lo a nih leh nih loh bakah khelh tir an phal loh chhan an sawifiah hma chu he championship kal mek hi titawp turin a ti a ni.
Tarlan tawh angin, Serchhip District Boxing Association chuan he Boxing Championship-ah hian mipat hmeichhiatna lam rawngkaia kumtling lo boxer-te a khawih thin avanga POCSO case-a jail tang mek MIZBA hruaitu pakhat thlavang hauhna nia ngaih theihin, he POCSO case thehluhnaa a tuartu (victim) nia insawi, Serchhip district aiawha khel tur hmeichhe boxer pathum chu tel ve phalsak an ni lo tih an sawi a. Hei hi sut a nih loh chuan an district aiawha khel tur boxer-te leh an district atanga he inelnaa referee leh judge atana ruat ho chu an hruai haw vek dawn tih an lo sawi tawh.
Hemi ang hian Nilaini khan Serchhip district atanga tel tur boxder 31 leh an coach bakah official tur mi pahnih chu Serchhip panin an haw tih thu dawn a ni.
He chanchin buatsaih lai thleng hian MIZBA chu MSSC hnenah a la insawifiah lo niin The Aizawl Post chuan thu a dawng.
Boxer tel phal ve loh nghawngah State huapa inelna titawp lailawk
