Brazil-ah lei min vangin mi 10 thi

Brazil-ah lei min vangin mi 10 thi

Brazil-a Minas Gerais state-ah khawpui pahnihah lei nasa taka minin mi 10 vel an thi niin state thuneituten an sawi.
Ipatinga khawpuia Bethania veng chu a tuar na ber niin nasa taka tuar a sur hnuah lei a tawlh nasa hle.
Mayor pisa chuan Pathianni tukah ringawt khan Ipatinga-ah hian ruah mm 204 a sur niin a sawi.
Ruah tam tak a sur hnua lei min hi fur lai chuan thil thleng fo thin a ni a, tlang pang awihah in saa mi tam tak an chen thin avangin chhiatna pawh a thlen nasa thin.
Ipatinga Mayor Gustavo Nunes chuan emergency a puang nghal.
Rio de Janeiro hmar lam km 570 vela hlaa awm, Ipatinga khawpuiah hian mi 150 vel chenna in nei lo an awm phah mek.
Mayor chuan an khawpuiin heti zat ruah an dawng ta chiam hi mak an tih thu a sawi a. “Mipui tan inralrinna hman reng reng a awm lo,” a ti.
Ipatinga-ah hian mi pakua vel thi an awm tih chian a ni tawh a, an khawpui hmar lama darkar chanve vel tlan, Santana do Paraíso-ah ruang pakhat hmuh a ni bawk.
Tual chhung chanchinbute chuan tlalai pahnih chu an in leiin a hnawl laiin himin an tlanchhuak hman a, an chhungte dang panga chu a chhilh tiin an tar lang.
Health centre pawh lei min hian a tichhia niin Ipatinga health minister chuan a sawi.
“Tun dinhmunah health centre hi mite tan pan a remchang rih lo va, damlote pawh hmun danga sawn turin nghah mek a ni,” tiin Walisson Medeiros chuan a sawi.
An thenawm khawpuiten an puihna avangin lawm thu a sawi a. Minas Gerais Governor Romeu Zema chuan Thawhtanni zan khan chhiatna thlenna hmun hi a tlawh bawk.

Comments (0)
Add Comment