Brazil fooball boss
nih tum Ronaldo
Brazil legend Ronaldo chuan an national team tlahniam zelin a ropui thinna a neihlet leh theihna’n an ram football association inthlanah president a chuh dawn tih a nemnghet.
Ram tana game 98 khel tling kum 48 mi Ronaldo hian Confederation of Brazilian Football (CBF) president hna chelh lai Ednaldo Rodrigues thlak turin candidate nih ve a tum chiang ta a, a hruaitu kawm chelh chhoh ve a duh chhan ber hi an ram football-in mi nuih a tihzat chhoh lek lek dawn tak vang a ni ber!
World Cup-a vawinga champion tling awmchhun Brazil hi kum 2002 hnu lamah world champion an ni leh ngai ta lo a ni satliah lo a, he tournament-ah hian kha mi hnu khan quarter-final stage an la pel leh ta ngai lo!
Khawvela forward ropui berte zinga chhiar tel kumkhua tawh tur Ronaldo chuan federation kaihhruai a duh chhan sawichhuakin, “Kum sawm tel tam tak chhung kha nitin khawsak kawnga harsatna tawk tlanchhiatna zawngte tan Brazilian football hi kulhpui nghet a lo ni tawh thin a, Brazilian mipuite tan engkima engkim a ni thin, vawiinah erawh he rammipuite hian national team an tuipui ta lo!
“CBF president chuh tur candidate ni tura phurna min petu za tel zinga pakhat chu national team ropuina leh zahawmna neihletleh hi a ni,” a ti.
Tuna president ni lai Rodrigues-a term hi March 2026 thleng la awh tur ni mah se an danah term tawp hma thla 12 la awmah presidential election buatsaih tur tih a ni a, chuti a nih chuan kum tharah hian CBF inthlan an huaihawt a ngai dawn tihna a ni.
Kum 1994 leh 2002 World Cup-a Brazil champion-puitu Ronaldo hian Fifa tournament lian berah belhkhawmin game 19 khelhah goal 15 a thun tling a, he competition all-time top scorer list-ah Germany legend Miroslav Klose chiah tluk loh a nei.
Real Madrid striker hlui Ronaldo hian a international career kum 17 chhung khan Copa America title pahnih leh Olympic bronze medal a hlawhchhuak tel bawk.
Kum 2011-a ram tana inkhelh a chawlhsan hnuah Brazil hian Copa America title vawikhat chiah an la sualchhuak a, 2022 World Cup-ah khan Croatia chuan quarter-final stage-ah an petchhuak.
Tournament liana national team chaurau ta lutuk chuan Ronaldo hi a titlawmngai hle niin a lang a; tuna an player neihte thlirin, “Khawvela player tha ber ber Vinicius Jr, Neymar, Rodrygo, Estevao, Endrick… tihte kan kawl a, he team-ah hian talent pawh a tam tawk a, heti chunga kan khel tha thei tlat lo hi a mak a, a chhan engnge ni ang?
“Kan kalphung hi kan thlakdanglam tawh a ngai a, Brazil hi World Cup-a a changtupa ber kan nih leh tawh a ngai. Copa America-ah pawh chuti tho. Olympics pawh kan thu berna tur bawk a ni. Kan talent ena kan chimchin ni chho ta hi pawmzam theih a ni lo,” a ti khauh bur!
President chuh a tum thu a nemngheh rualin Ronaldo hian La Liga club Real Valladolid-a chanpual a neihte a hralh tur thu a tarlang tel.
Brazil fooball boss nih tum Ronaldo
