Brazil foreign minister chuan United Nations leh multilateral institution dang te chu khawvel buaina dang thei lo tia sawiselin reform ngei ngai tiin Group of 20 presidency a chelh hnuah a sawi.
Rio de Janeiro a G-20 foreign minister meeting neihnah Mauro Vieira chuan UN Security Council chuan Ukraine leh Gaza strip a buaina te pawh a dang thei lo tiin a sawi a.
“Tunlai khawvel harsatna sukiang turin multilateral institution awm mek te hi a tawk tawh lo, tun laia buaina Security Council in a chinfel theihloh danah hian a lang chiang a ni” tiin Vieira chuan a sawi a.
Ram hausa mek leh thang lai mek ram 20 foreign minister theuh te chu tunkar hian retheihna, climate change leh global tension te bakah November 18-19 summit Rio a neih tura roadmap te siamin an inhmukhawm mek a.
Brazil-in rawtna a siam pawimawh tak pakhat chu global governance institution heng United Nations, World Trade Organization leh multilateral banks te chu reform ni se, developing ram tam zawk ten aiawh nei tawh se tih a ni.
Brazil leftish leader Lula chuan February 18 khan UN Security Council chu tihlen ni se, Africa, Latin America atangin ram luhbelh se chubakah India, Germany emaw Japan emaw pawh lut tel se a lo ti tawh a ni.
“Mi tam zawk kan belh a ngai a, UN ah veto hi tihtawp bawk ni se, a chhan pawh ram pakhat maiin member tin te remtih tlan a hnawl ngawt thei kha a dik lo” tiin Lula chuan a sawi bawk.
Lula ngenna chuan awmzia a nei ang em tih erawh a hriat lo, tun hma chuan UN reform nise tia rawtna te chu Security Council permanent member ten an duh ngai lo a ni.
“Tun dinhmunah UN reform tumna boruak a awm lo. UN hian harsatna a tawk a, tuna Security Council siamthat hi a fuh chiah lo zawk mai thei” tiin Lucas Pereira Rezende, political scientist, Federal University of Minas Gerais chuan a sawi.
Vieira chuan Brazil chuan khawvel hmun hrang hranga buaina chhuak a vei em em Ukraine leh Gaza mai ni lo hmun 170 chuangah buaina a awm mek tiin a sawi bawk a.
Vieira chuan khawvel huapin ralthuamah kum tinin $2 trillion chuang sen a ni a, chunga sum hman ai chuan aid programme kalpui nan te hman ni zawk se tiin a sawi bawk a.
“Intluktlanlohna leh cliamte change te hi mihring dam khawchhuahna atana hlauhawm a nih chuan he ti lam hi kan vei tawk lo a ni” tia sawiin, “Kum 2024 ah chuan heng indona te hi hmachhawn zawk tur kan ni” a ti bawk.
Nilaini khan Lula chuan US Secretary of State Antony Blinken chu Brasilia ah kawm bawkin darkar hnih lai global governance leh issue pawimawh hrang hrang te an sawi dun a. Blinken hian ni thum chamin Brazil leh Argentina te tlawhin Rio a G-20 meeting ah a tel bawk ang.
Hruaitu pahnih te chuan gaza buaina chungchang pawh sawi dunin mitang te rang taka chhuah zalen an nih theih nan te Palestinian civilian tena tanpuina an dawn theih nana hma lak ni se an ti tiin US Department of State thuchhuah chuan a tarlang.
Brazil-in United Nations a sawisel
