Britain, Canada leh Australia ten Palestine ram pawm ta

Britain, Canada leh Australia ten Palestine ram pawm ta
Britain, Canada leh Australia chuan Palestinian-te ram an pawm ta a, buai rengna hmun chu ram pahniha siam mai chu thil tha zawk ni turah an ngai a. Hetih lai hian Israel leh an thawhpui lian, US erawh an lawm lo hle tura ngaih a ni.
Israel-in a thawhpui ram lian khawthlang ram pathum bakah ram dang 140-te pawhin Palestinian-te baihvaihna chu tihtawp tha an ti a, Israeli-te awpna rama an pual ram neihtir chu tha an ti hlea hriat a ni.
Britain hi Indopui II-na a zawh hnuah Israel ram a pian theih nana pawimawh tak a nih avangin hetiang thutlukna a siam hian kawng hrang hrangah nghawng a neih rin a ni.
“Vawiin hian Palestinian leh Israeli-ten muanna an beisei ang a thar nan ram pahnih neih a tha a, United Kingdom chuan tih dan pangngai angin State of Palestine hi ramah a chhal a ni,” tiin Prime Minister Keir Starmer-a’n a sawi.
“Gaza-a mihringin a siam chawp mipui mangangna chu a thuk tawh hle a. Israeli sorkarin chawl lovin Gaza a bei a, tun hnaia a beihna phei chuan tamna leh chhiatna a thlen nasa hle a ni,” a ti.
France telin ram dangte pawhin tun kar tawpa New York-a UN General Assembly-ah Palestine ram hi an pawm ngei beisei a ni.
Israeli Security Minister Itamar Ben-Gvir chuan Britain, Canada leh Australia ramte thil pawl chu ‘tualthattute’ tia a sawi, October, 2023-a an ram beitu Hamas-te hlawkna tur a nih thu a sawi.
He beihna avang hian Israel-ah mi 1,200 chuang thiin hren turin mi 251 an hruai bawk a, indona a chhuah zui phah.
Israel hian a beih zuinaah Palestinian 65,000 chuang an thi tawh a, a tam ber hi civil mi an ni tih Gazan damdawi in thuneituten an sawi a. Tam a tla a, in ding tam zawk chhe tawhin mi sang tel baihvaiin an awm tawh.
Palestinian President Mahmoud Abbas-a chuan Palestinian-te ram pawm a ni chu lawmawm a tih thu a sawi a, ‘Israel ram sir ve ve-ah Palestine ram chu himna, thanna leh inthenawm tha niin a ding dawn’ tih a sawi.
Starmer-a hian Abbas-a hnenah Britain-in an ram an pawm tih hi ziakin a hrilh a, London-in kum 1917-a Juda-te ram chu a thlawp thu a hrilh rualin Juda ni lote dikna hum pawh a tiam tih a sawi.
“UK chuan Palestinian mipuite tan Palestinian State a pawm a, ram pahnih hmanga him leh muang taka Palestinian leh Israeli an chen chu a duh a ni,” a ti bawk.
Khawthlang ram sorkarte hi an party leh mipuite atangin Gaza-a thihna tam lutuk, naupangte tama an awm leh Israel-in namen lova a beih avangin muanna a awm theihna turin an nawr nasa hle hlawm a ni.
Canadian Prime Minister Mark Carney-a’n Palestine ram an pawm tih a puannaah muanna a awm theihna tur leh Hamas an tawpna tur an kalpui zel dawn tih a sawi. “Firfiakna hi dan hnuaiah a awm lo va, lawmman pawh a awm hek lo,” a ti.
Pathiannia ram pathumin Palestinian-te tan ram an pawm thu an puan hnuah Israeli Minister Ben-Gvir chuan cabinet-ah Israeli-awp Palestinian hmun dang, West Bank-ah thuk zawka inrawlhna tur thlen tur a nih thu a sawi nghal a. He hmun hi kum 1967 indo atanga an awp a ni.
Israel-a eptu hruaitu, Yair Lapid-a pawhin Palestinian ram siam chu tha a tih loh thu a sawi a, hetih rual hian Netanyahu-a sorkar chu palai hmanga inbiaknaa a hlawhchhamah a dem thu X-ah a tar lang.