British MotoGP hnehtu Bezzecchi

British MotoGP hnehtu Bezzecchi
British motorsports tlankawng hming-thang Silverstone-a Pathianni British Grand Prix-ah khan Italian Marco Bezzecchi chu pakhatna niin, kum 2023 season hnu lama MotoGP hnehna a chan vawikhatna a nih rualin tun season kal laia Aprilia an chak hmasakber a ni tel nghal.
Silverstone tlankawnga oil bua avangin red flag vai a ni a, rider an thal pheng phung a, hmahruaitu lamte zingah pawh chesual leh tlan chhunzawm thei ta lo an awm fur!
Chuti ang buai nuai kara pakhatna dinhmun rawn luah nawlh Bezzecchi hnehna kha nikum Grand Prix of the Americas hnu lama Aprilia team-in grand prix hnehna an chan leh vawikhatna niin, pahnihnaah LCR Honda rider Johann Zarco a thleng a; lawmman semna dawhsan hniam ber luaha pathumna ni ta chu Franco Morbidelli hmakhalha podium chang Ducati rider Marc Marquez niin, Britain ram tlankawnga a point hmuh hmangin world championship-a a hmahruaina a sawhnghet leh det.
Tarlan tawh thin angin, kumin hian MotoGP-ah Spaniard Marquez unau an rawn langsar rual hle mai a, an inchak chhawk loh leh podium an lawn dun zak zak a, mahse, Pathianni race-ah Marquez leh a nau Alex hi chesual zingah an tel a; an tlan nawn leh hnuah polesitter Fabio Quartararo pawhin a hmahruaina chhunzawm leh mah se a bike chian loh avangin a tawp a thleng zo ta lo a ni.
Tun Pathianni hmaa Bezzecchi chak hnuhnunber chu 2023 Indian Grand Prix kha niin, British Grand Prix race hnuhnung vawi 11-a Silverstone champion ni thei rider 11-na chiah a ni bawk!
He tlankawngah hian race hnuhnung 11-ah hian chak nawn an awm miah lo a, hei hi tlankawng danglam a nihna pakhat pawh a ni awm e.
Hnehna a sualchhuah hnuah Italian rider chuan a hun tawn mak a tih thu sawi chungin, “Ka tan tun thla hi a hautak kher mai a, chuti chungin ka lakah Aprilia hian rinna an nghat lui ve tlat a; rim takin kan thawk a, team hnathawh hi a ropui thlawt a ni. Ka chak hnuhnunber atang khan he ni hi ka nghak ngat ngat a ni,” tiin kum 2023 hnu lama hnehna chang tura a thawhrim dan a sawichhuak.
Inrinni sprint race-ah aitechhinna lama chak mar tak Marc Marquez-a chungnunna paihthlain a nau Alex Marquez a chak a; a tuk Pathianni Grand Prix tak takah pawh Spaniard naupang zawk hian bul a tan tho at a, pole position atanga tlanchhuak Quartararo hial pawh a tlenpel thei a, mahse, first turn lekah a bike a thunun zo lo a, a chetsual chuan pawthniamin pangana a ni pha ta chauh a ni!
Morbidelli leh Aleix Espargaro insutbuai atanga oil putchhuakin chetsualna runpui a thlen avanga red flag an vai hmain Marc zawk pawh chesualin, ani erawh podium lawn zawngin a tholeh thung.
Race tan that leh a nih hnuin Quartararo chuan a hnu deuha chesual zui ve ta tho Francesco Bagnaia kut atangin hmahruaina a lakir leh a, mahse, chhiatna bawkin Yamaha rider Quartararo hi a bawhbuai leh a, a bike fel lo avangin Frenchman hian a tlan zawm thei ta lo a, rin loh takin Bezzecchi a rawn dingchang ta nawlh a, Italian manufacturer tana a hnehna hmasaber a ni nghal.
2025 MotoGP British Grand Prix kha lap 20 tlanna niin, Ducati rider-te’n harsatna lian tak an tawk a; hliam avanga talbuai rei tawh tak reigning world champion Jorge Martin pawh tlankawngah a la inlan thei lo a, Aprilia-a a contract tihtawp chungchang a richhuak hluai bawk.
Ducati rider chhuanvawr Marc Marquez chuan point 24-in championship-ah hma a hruaifal ta a; a hnuai chiahah a unaupa Alex Marquez of Gresini awmin point 172 a hum a; pathumna Francesco Bagnaia of Ducati Lenovo chuan point 124 a ngah ve tawh bawk.