Bru tana kum thar chhinchhiahna ni, Boisu 3-na chu Inrinni khan hmun hrang hrangah hman a ni a, Aizawla an hman chu larsap Dr Hari Babu Kambhampati chuan a hmanpui. He festival thupui chu “Joto yak romlai ye, phaidi jati no toisa lai na” (Insuihkhawmin kan khawtlang I siamtha ang u) tih a ni.
Larsap chuan Bru hnam tana hun pawi mawh tak, an kumthar chinchhiahna a telpui thei chu lawmawm a tih thu a sawi a. Bru hnamin harsatna tam tak an tawh kara an tawrhchhelna chu fakawm a tih thu sawiin, an kal zelna turah duhsakna a hlan tih a sawi. Bru khawtlang hruaitute chu sawrkar laipuiin scheme hrang hrang a duan chu ngaihven a, mipuiin an hriat zau nan hma la turin a fuih.
“India ram ropuina ber chu, hnam hrang hrang awm mah ila, kan inpumkhatna hi a ni a. He inpumkhatna hi vawnnun zel pawimawh. Mitinin midang nunphung, hnamzia zahthiam ila, hnamtin inlungruala kan awm ho theih nan hma kan sawn zel a tul a ni,” a ti.
Boisu Festival-ah hian Chakma leh Bodo hnam aiawhte pawh an tel ve a. Festival hi kumtin April 13 -15 inkara lawm thin niin, mipa, hmeichhia, naupangten zai leh lamin hun an hmang a ni.
Bru-in Boisu Festival hmang
