Miley Cyrus hla hit ‘Flowers’ kha 2023-a hla lar te zinga mi a tih ngam a, he hla avang hian Miley pawhin Grammy Award a dawn phah kha a ni a, mahse, he hlaah hian Bruno Mars hla, 2013-ah a tihchhuah ‘When I Was Your Man’ chu Miley hian phalna nei lovin an lachhawng nasa ni a puhin, Los Angeles federal court-ah thubuai an theh lut.
Thubuai theh luttu hi company, Tempo Music Investment an ni a, Bruno Mars hming chu a lang ve lo. Tempo Music Investment hian he ‘When I Was Your Man’ hla co-writer Philip Lawrence hnen atangin a neitu nihna zinga tel ve theihna rights an lei niin an sawi a, thubuai theh luttu-ah hian Bruno Mars hming a lang ve lo thung.
Tempo Music Investment hian Miley Cyrus bakah ‘Flowers’ hla phuahtu zinga mi Gregory Hein leh Michael Pollack leh a hla thehdarh lam buaipuitu Sony Music Publishing, Apple, Target, Walmart leh company dangte pawh an khin zingah hian an tarlang tel bawk.
Tempo Music Investment chuan, “Bruno Mars ‘When I Was Your Man’ hla fans chuan Miley Cyrus-i’n Flowers a hlawhtlinpuina hi ama kutkawih liau liau a ni lo tih chu an hre thei vek ang. Flowers-ah hian a melody, harmony leh lyrics-ah te When I Was Your Man hi an la chhawng nasa a, a melodic pitch design leh a chang indawt dan, bass line inzawm dan, a thunawn bar pawimawh, lyrics thenkhat leh chord progression-ah te an entawn nasa a ni,” a ti a, “Heng hla pahnih hi a inanna hmuh tur a tam lutuk, Flowers hi When I Was Your Man tel lo chuan a rawn piang dawn lo. Flowers hmang hian Cyrus, Hein leh Pollack te hian phalna nei lovin When I Was Your Man hi an la chhawng a ni,” an ti bawk.
Flowers hla avang hian Miley pawhin a Grammy hmasa ber dawngin, best pop solo performance a dawng a, Billboard Hot 100 chart-ah pawh kar riat chhung a No.1 thei nghe nghe a ni.
Bruno Mars hla copy-a puhin Miley Cyrus an khing
