BTS album ‘ARIRANG’ chu Billboard 200 (US albums) chart-ah a No.1 a, he chart-ah hian a zawnin kar thum a No.1 tling ta a, an album No.1 kai tawh pasarih zinga he chart-a No.1 ni rei thei ber a la ni.
Billboard 200 chart hi kar khat chhunga US-a album hralh tam atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
BTS ‘ARIRANG’ hi kar khat chhungin US-ah 1,24,000 an hralh leh a, chung zinga 71,000 chu album tak tak hralhna niin, streaming atangin 50,000 (on-demand official stream maktaduai 52.44) a tling thei a, album-a hla a mala hralhna atangin 3,000 a tling thei bawk (album-a hla a mala 10 hralh chu album pakhat hralh anga chhiar thin a ni).
Chart No.1 hlui Morgan Wallen “I’m the Problem” chu 80,000 hralh lehin No.4 atangin No.2 a kai thar leh a, Ye (Kanye West ni thin kha) album ‘BULLY’ chu 69,000 hralh lehin No.2 atangin No.3-ah a tawlh a, chart No.1 hlui Don Toliver ‘OCTANE’ chu 57,000 hralh lehin No.8 atangin No.4 a kai thar leh a, Olivia Dean ‘The Art of Loving’ chu 50,000 hralh lein No.7 atangin No.5-ah a insawn thar leh a, Luke Combs “The Way I Am” chu 46,000 hralh lehin No.6-ah bawk a la awm.
Chart top 10 khartu album pali te chu No.1 hlui vek niin, Bad Bunny “DeBI TiRAR MaS FOToS’ chu 45,000 hralh lein No.9 atangin No.7-ah a insawn thar leh a, Morgan Wallen “One Thing at a Time’ chu 39,000 hralh lehin No.14 atangin No.8-ah a lang thar leh a, Harry Styles “Kiss All the Time. Disco, Occasionally” chu 37,000 hralh lehin No.10 atangin No.9-ah a insawn leh hret a, Bruno Mars ‘The Romantic’ chu 37,000 tling lo deuh hralh lehin No.12 atangin No.10-ah a kai thar ve leh bawk.
BTS ‘ARIRANG’ kar 3 a No.1 ta
