BTS ‘Butter’ leh Beyonce ‘Single Ladies’-in YouTube 1B view kai
YouTube-a music video vawi tluklehdingawn en hlawh thei neih hi zaithiam te tan mellung pawimawh pakhat a tling tawh a, an hla lar dan leh an music video hlawhtlin dan tehna pawimawh a tling ve tawh tlat a ni. Hetiang karah hian K-pop group BTS hla hit ‘Butter’ leh Beyonce ‘Single Ladies (Put a Ring on It)’ te music video chuan YouTube-ah he mel lung hi an thleng ve ta.
BTS hian ‘Butter’ music video hi May 2021-a an tihchhuah kha a ni a, kum thum leh a chanve chhungin hetiang zat view hi a kai tei a, heti hian YouTube-a vawi tluklehdingawn en hlawh thei music video pasarih an nei tling ta a ni.
‘Butter’ hla hi an hlawhtlin pui viaua, 2022 Grammy Awards-ah khan best pop duo/ group performance category-ah nominate a ni a, 2021 MTV Video Music Awards-ah best K-pop award an dawn pui a, a hla hi Billboard Hot 100 (singles) chart-ah kar 10 a No.1 thei a, 2021 Songs of the Summer chart-ah No.1 a ni thei bawk.
Beyonce hla leh music video lar tak, he hla leh a music video-a a dance move pawhin zirchhawn a hlawh nasat em em ‘Single Ladies (Put a Ring On It)’ music video hi a tihchhuah atanga kum 15 hnuah YouTube billion view a kai ve ta a, Beyone tan a music video YouTube-a vawi tluklehdingawn en hlawh thei pahnihna a ni a, a hma zawk hi ‘Halo’ music video kha a ni.
‘Single Ladies (Put a Ring On It)’ music video hi black & white video niin, lamthiam dang pahnih nen hmuhnawm takin an lam tluanchhuak zak a. ‘Single Ladies’ hi 2008 khan Billboard Hot 100 chart-ah kar li a No.1 thei a, a video hi Jake Nava direct niin, a choreography hi Frank Gatson Jr. leh JaQuel Knight niin, an dance move pawh hmuhnawm tham tak a ni a, vawiin thleng pawha entawn hlawh tak a la ni.
‘Single Ladies’ video hi Taylor Swift leh Ye te buai tanna kha a ni a, 2009 khan MTV VMA-ah Swift-in best female video award a dawng a, he category-ah hian Beyonce ‘Single Ladies’ video hi nominate a ni ve tho a, Swift zawkin award a dawng ta chu Ye (hmanah chuan Kanye West a nih thin kha) hian Swift award dawng lawmthu sawi tur tibuaiin, microphone a lak sak a Beyonce chu zawk chu award dawng tur ni a a hriat thu leh Bey-i video hi video tha berte zinga mi a nih thu a puan khum ta kha a ni.
Kha thil thlen lai khan Beyonce pawh a hrilhhai hmel ve hle kha a ni a, a hnuah ‘Single Ladies’ hian video of the year a dawng a, Beyonce hian a award dawn lawmthu sawina tur hun chu Taylor Swift tan kianin, Swift hi stage-ah a kochhuak a, lawmthu a sawi tir ve leh thung a ni.
BTS ‘Butter’ leh Beyonce ‘Single Ladies’-in YouTube 1B view kai
