K-pop superstars BTS chuan an hla thar ‘Take Two’ tih chu June ni 9-ah an tlangzarh dawn a, he hla thar hi an group kum 10 tlin champha lawm nana an tih a ni.
A hla title ‘Take Two’ tih hi BTS pawhin an rimawi zinkawngah bung thar an kai tih entirna niin HYBE chuan an tarlang a, an fans ‘ARMY’ te puala an tih niin an tarlang bawk. He hla thar production-ah hian BTS member SUGA pawh a inhnamhnawih thuk viau a, RM leh J-Hope ten a hlaphuah lamah tha an thawh ve bawk.
BTS hian an kum 10 tlin pual hian BTS 10th Anniversary FESTA an buatsaih dawn a, he annual event hi an group debut-na ni, June ni 13, 2013 nen a inrual chiah a, a grand finale hi June ni 17-ah Seoul-ah an nei dawn a, BTS FESTA hi Yeouido, South Korea-ah neih tur a ni a, mipui tan a chhim theih dawn a ni.
Jin, Suga, J-Hope, RM, Jimin, V, leh Jungkook te telna BTS hi Billboard chart-ah 2013 khan a vawi khat nan an hla ‘No More Dreams’ avangin an lang a, World Digital Song Sales-ah No.14 an ni. Heta \ang hian record chi hrang hrang an siam ta deuh mawlh mawlh a, chung zingah chuan group zinga Billboard Hot 100 chart No.1 a hla debut thei ngah ber nihna te, group zinga chart top 10-a hla debut thei ngah ber nihna te pawh a tel. Tunah chuan group member pasarih te hi a mimal angin Billboard Hot 100-ah an lang vek tawh bawk a ni.
An group hian Hot 100-a No.1 kai thei hla paruk an nei tawh a, an member Jimin chuan a hla ‘Like Crazy’ chu a mimal angin No.1 a kaipui tawh bawk a, heti hian The Beatles leh Supremes hnung zuiin, group anga No.1 kai thei hla paruk nei bakah group member zinga tu emaw ber No.1 ni thei zingah an tel ve ta a ni.
BTS hla thar tur ‘Take Two’
