BTS J-Hope sipai atangin a chhuak ta

BTS J-Hope sipai atangin a chhuak ta
BTS member J-Hope, a hming tak Jung Ho-seok, kum 30, chu South Korea dana an ram thalai ten sipai nunchan an zir ngei ngeina tura bituk chin, thla 18 chu zoin, 36th Infantry Division atangin October ni 17 khan an chhuak ve leh ta a, BTS member zinga sipai tan hun tur zo pahnihna niin, Jin nen an sipai tan hun tura bituk an zo ta a, member dang zawng chu sipai-ah an la tang vek a, member zawng zawng sipai atanga an chhuah vek theih hun chu 2025 a ni dawn chauh a ni. J-Hope hi a thianpa Jin leh fans rualin an lo hmuak a, a sipai tanna Wonju, Gangwon province-a military base atangin sipai uniform nena a chhuak fans lamin an lo au nasa hle a ni.
Jin hian kumin June thla khan a sipai tan hun a lo zo fel tawh a, a thianpa hi lo hmuakin, pangpar bawr lian tha tawk tak hlanin a lo kuah a ni. J-Hope chuan, “Fan-te chungah ka lawm e, him dam tak leh hriselna tha tak nen ka tlingtla thei ta. He kum khat leh a chanve chhunga ka rilru a awm chu sipaite hian inpekna an lo thawkrim hle a, ram himna atan theihtawp an chhuah a ni,” a ti.
J-Hope hian Wonju mipui te pawhin an support-na avangin lawmthu a sawi a, “Thla 18 ka sipai tan chhungin, instructor angin ka awm a, kan kal kual ve nasa hle a, chuvangin Wonju mipui pawh ka hmu tam. Mipui min lo lawma, sipaite lo au phur thintu te chungah lawmthu ka sawi. Ka rilru a khawih tak zet a ni,” a ti.
BTS hi 2022 atangin group angin an che chhuak ta lo va, an member ten solo project an tih sap sap bakah an sipai tan hun an zawh theih nan hun an siam sak a ni ber a, member zawng zawngin sipai tan an zawh vek hun, 2025-ah group angin an che chhuak leh thei dawn chauh a ni.