BTS member zinga Billboard Global chart-a solo a No.1 ni thei hmasa ber Jung Kook
Jung Kook “Seven” featuring Latto chu Billboard Global 200 chart No.1-aha debut a, Jung Kook leh Latto te tan he chart-a soloist anga an No.1 vawi khatna ve ve a ni a, Jung Kook hi BTS member zinga he chart-a BTS member soloist anga No.1 ni thei hmasa ber a ni bawk. Hetihrual hian Jason Aldean hla thar ‘Try That in a Small Town’ chu No.2-ah a debut.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
Jung Kook “Seven” featuring Latto hi stream maktaduai 217.1 leh download sales 2,69,000 a tling thei a, Billboard Global 200 chart an tih tan atangin soloist hla kar khat chhunga stream natsat ber a la ni. A hmaa he record siamtu chu Miley Cyrus ‘Flowers’ kha niin, “Seven” hian a rawn khum ta a ni. A nawlpuia lakah pawh Jung Kook “Seven” hian kar khat chhunga stream tamah hla pakhat chiah phak loh a nei a, chu pawh BTS hla ‘Butter’ kha niin, June 2021 khan he hla hi kar khat chhungin stream maktaduai 289.2 a tling thei a ni.
BTS hian group angin Billboard Global 200 chart-ah hian top 10 kai thei hla 11 nei tawhin, chung zinga hla pasarih chu No.1 an kai a, mahse, soloist ang chuan Jung Kook chiah hi an member zingah he chart-a No.1 kai thei a la ni. An member dang Jimin chuan April thla khan a hla ‘Like Crazy’ chu No.2 a kaipuia, Charlie Puth feat. Jung Kook chu July 2022 khan No.5 a kai a, PSY feat SUGA “That That” chu May 2022 khan No.5 a kai a, Jimin ‘Set Me Free, Pt. 2″ chu April 2023 khan No.8 a kai a, Jung Kook “Dreamers (Music From the FIFA World Cup Qatar 2022)” chu December 2022 khan No.9 a kai a, Jin ‘Astronaut’ chu November 2022 khan No.10 a kai ve tawh bawk.
Hmeichhe rapper Latto tan ‘Seven’ hi he chart No.1-a a lan vawi khatna leh chart top 10-ah pawh a lan vawi khatna a ni a, a hmaa a thlensan ber chu April 2022-a ‘Big Energy’ No.32 a kai pui kha a ni.
Jason Aldean hla boruak ngah zet mai ‘Try That in a Small Town’ chu stream maktaduai 11.1 leh download sales 2,33,000 tlingin No.2-ah a debut. He hla hi May thlaa a tihchhuah tawh kha niin, July ni 18 khan a music video chu CMT-in ni thum an chhuah hnuah a racist ti leh a thawhrumna thawhna leh infuihpawrhna hla ti a sawiselna a awm avangin an hnuk kir a, mahse, hetianga boruak a neih hnu hian a hlain ngaihven a hlawh thar a, streaming leh sales a pung ta hluai zawk a ni. Jason Aldean tan tun hi he chart top 10-a a lan vawi khatna a ni mai piah lamah top 40-ah pawh a vawi khat lanna a ni.
Myke Towers “LaLa” chu No.3-ah bawk awm lehin, chart No.1 hlui Olivia Rodrigo ‘Vampire’ chu No.4-ah a tawlh a, NewJeans “Super Shy” chu No.2 atangin No.5-ah a tawlh ta bawk.
Billboard Global 200 Top 10:
1 Seven – Jung Kook Featuring Latto
2 Try That In A Small Town – Jason Aldean
3 LaLa – Myke Towers
4 Vampire – Olivia Rodrigo
5 Super Shy – NewJeans
6 Fukumean – Gunna
7 Cruel Summer – Taylor Swift
8 Flowers – Miley Cyrus
9 Calm Down – Rema & Selena Gomez
10 La Bebe – Yng Lvcas x Peso Pluma
BTS member zinga Billboard Global chart-a solo a No.1 ni thei hmasa ber Jung Kook
