BTS member zinga hausa ber ‘V’
South Korea-a Instagram update page hriathlawh tak @seoul.southkorea chuan niminpiah khan BTS member Kim Taehyung, aka V chu BTS member pasarih te zinga hausa ber niin an tarlang a, V hausakna hi India pawisa cheng vaibelchhe 342 (dollar maktaduai 40 vel) niin an tarlang bawk.
V sum hmuhna lian zual te chu music bakah social media leh fakna hrang hrang te niin an tarlang a, a solo album hmasa ber ‘Layover’ chu September 2023 khan Billboard 200 (albums) chart No.2 a lo kai tawh bawk a nih kha. V hi K-pop idols zinga Instagram follower ngah ber pawl niin, follower maktaduai 67 chuang a nei a, a social media atangin sponsored post pakhatah dollar 8,00,000 vel zel a hlawh pha niin an tarlang bawk.
BTS member zinga hausa ber a nih thu an puan hnu lawkah fans lamin a hlawhtlinna an lawmpuina social media-ah an post nghal sup sup a, X-ah phei chuan “King’ tia sawi tawk te pawh an awm. A sipai tan chhung pawhin a huhang a zuai tak tak thei chuang lo a, a brand power chu sawinghing zawh rual loh niin fans lam chuan an tarlang bawk a ni.
V hian khawvel huapa luxury brand lar thawhpui a nei nual a, French fashion label Celine nen 2023 khan an brand theh lartu ni turin inremna an lo nei tawh a, jewelery brand hriathlawh tak Cartier brand ambassador a nih bakah Panthere line nen an thawkho bawk. Lirthei siamtu hriathlawh Hyundai campaign hrang hrangah a tel thin a, McDonald’s leh Indonesian investment platform SimInvest nen an thawkho bawk. Heng brand hrang hrang a thawhpuina atangin sum tam tak a lak luh bakah fashion leh branding industry-ah a huhang a tihlen belh zel a ni.
GQ-in a tarlan danin V hian SK Apelbaum complex, Gangnam, Seoul-ah apartment sq ft 3,000 a lian a nei a, a apartment hi cheng vaibelchhe 39 man vel a ni a wardrobe-ah pawh designer kutchhuak chi hrang hrang Gucci, Bottega Veneta leh Celine te a inhnawh khat tun a, K-fashion ah pawh huhang nei lian ber zinga mi a ni. V hian luxury car pawh a garage-ah a huang ve nual a, chung zingah chuan Genesis GV80 SUV, Porsche Panamera GTS leh Lamborghini Aventador S te pawh a tel.
V hian sipai nunchan zira South Korean sipai, Special Duty Team-a thla 18 a tan hnuah June ni 10, 2025 khan sipai a chhuahsan leh tawh a, tunah chuan civilian nun a hmang leh tan tawh a, sipai atanga a chhuah hnuah mipui hmuh turin J-Hope-a ‘Hope On The Stage’ encore concert-ah a inlan a, director Park Chan-wook leh actress Youn Yuh-jung te tawiawmin classical music event-ah a inlan, Weverse Live chat-in fans a barakhaih tawh bawk.
BTS member Kim Taehyung, V tia hriatlar chu facial analysis studio chuan a hmel a ‘perfect’ niin an tarlang. US-a hmunpui nei scientific facial analysis organization Qoves Studio chuan zirchianna “Engvangin nge Kim Taehyung hi a hmelthat em em?” tih neiin, hetah hian plastic surgeon, beauty consultant leh fashion/modeling agency hrang hrang ten hmaifang (facial structure) tha leh dik an tehna te hmangin V hmel hi an zirchiang ta a ni.
Qoves Studio chuan, “Kim Taehyung, V tia hriatlar hi K-pop mipa zinga hmeltha ber ti te pawhin an lo sawi tawh thin a,” tiin, a hmelthat em emna chhan nia an zirchhuah tak chu a hmaifang, sam, mithmul leh a hmui te chu a inmil mawi tawk chiah niin an tarlang a, V hmui sen tai deuh chu thenkhatin a nû deuh mah mah a ti a nih pawhin, hei hian a duhawmna a tipung lehzual niin an tarlang bawk.
Qoves Studio chuan V vun pawh a ‘perfect’ niin an tarlang a, skin imaging technology SIAscopy hmanga an endiknaah V vun chu duhthusam a tha niin an tarlang bawk.
V hi khawvel hmun hrang hranga ‘Most Handsome Men’ list-ah a chungnung ber a ni deuh zel a, hei vang hian a hming lemah “hmeltha title kawl kawmtu” ti te pawhin an sawi hial a, Google Trends-in ‘The Most Handsome Man’ a zawnnaah pawh No.1 a ni.
V hian khawthlang ram ten hmeltha an tehna facial golden ratio a neih bakah khawchhak lam duhawm rûk riauna a nei tel bik tlat niin an sawi bawk.
BTS member zinga hausa ber ‘V’: V a hmeltha em mai!
