Zo hnahthlakte leh Meitei inbeihna Manipur-a Kangvai khua leh a chhehvelah Inrinni khan hnam pahnihte an inkap nasa a, a then chuan May ni 3-a silai a puah hnua an inkah nasat berna a nih an ring.Manipur atanga thu dawn danin, Inrinni vartian atangin an inkap a, chhun lama an inkah char char bakah zanah pawh an la inkap. Chawlhni leh Thawhtanni khan a zia deuh a, mahse Thawhtanni chawhnu lamah pawh silai puak thawm hriat tur a la awm.
Meitei lamah mi pathumin nunna an chan a, Zo hnahthlak lamah mi pahnihin nunna an chan tih thu dawn a ni a, Zo hnahthlak lamah hian mi 13-in hliam an tuar tih thu dawn a ni bawk.
Thu dawn danin, Meitei lam hian ralthuam leh hmanrua an nei tha a, grenade leh mortar bomb pawh an hmang. Zo hnahthlak hliam tuarte pawh hi bomb vanga hliam an ni.
Kangvai hi Churachandpur district khaw tawp a ni a, Imphal nena an inkara awm niin, inhnaih te tein khua an awm a, an buai tirh atanga an ‘duty’ ngawrhna a ni.
Tun hnaiah Kangvai leh a chhehvelah hian an inkap a, kar hmasa leh a hmasa lamah khan an inkap deuh reng tawh. August ni 4-ah a nasa zual ta a ni.
Kangvai atanga metre 400-500 velah Meitei lam hi ngawrh takin an ‘duty’ ve a, inkap pha renga awmte hi mahni tanhmun atanga ve vein nasa takin an inkap ta a ni.
Kangvai vela an inkah lai hian, Inrinni chhunah Imphal-a Lamphel-ah Presbyterian biak in tihchhiat a ni leh.
Zomi Students Federation te’n an chhinchhiah dan chuan, August ni 1 thleng khan Manipur buainaah biak in 357 tihchhiat a ni tawh a, Inrinni-ah pakhat tihchhiat a ni leh.
Kangvai bak hmun dangah an dai rih a, inkah nasatna Sugnu vel leh Kangpokpi district lam pawh tun hnaiah an dai rih tih thu dawn a ni.
Buai hnua inkah nasatna Kangvai-ah silai thawm la reh lo
