Buaina a reh, Ladakh pum a muanawm – LG Gupta

Buaina a reh, Ladakh pum a muanawm – LG Gupta
A hma nia Leh-a mipuiin an thil phut an lantirnaa police nen an innawrnaah mi pali thia mi dang 90 vel inhliam an awm hnuah Ladakh Union Territory Lt Governor Kavinder Gupta-a chuan Ningani kha chuan boruak a muanawm a, venhimna pawh khauh taka kenkawh a ni tih a sawi.
Gupta-a hian muanna a awm zel theih nan hma an la zel tih a sawi a, Nilainia tharum thawhnaa mawhphurtute man kawngah pawh theihtawp an chhuah tih a sawi bawk.
PTI Video hnenah LG Gupta chuan mi thenkhatin muanna leh hmasawnna an duh lo va, dan leh thupek kenkawhna tibuaiin an ram bialah harsatna an thlen ta niin a sawi bawk.
“Nimin lama tharum thawhna nasa tak thleng kha tunah chuan thunun vek a ni tawh a. Dinhmun a tha leh tawh a, nimin (Nilaini) tlai dar 04:00 hnu lamah chuan khawi hmunah mah boruak duhawm lo thleng a awm kan hre tawh lo,” a ti.
Gupta-a hian buaina a chhuan chhunzawm tawh lohna turin hma an la tih a sawi a, heng zingah hian NBSS Section 163 tlawh chhanin mi pun khawm khap a ni a, hei hi pungkhawma pawi khawi leh boruak siam tum ven nana an tih a ni tih a sawi.
“Hliam tuar mi 90 zinga 19 chauh damdawi inah an awm tawh a, mi dang chu chhuah leh vek an ni tawh a. Tuna la awmte pawh hi naktuk zing (Zirtawpni)-ah chuan chhuah theih vek an nih a beiseiawm,” a ti a. Ladakh-a chengte chu buaina siam tum zinga tel lova kalsan zel turin a ngen bawk.
“Buaina siam mai duh tur ang chi chu kan thlithlai reng a, thenkhat chu kan man bawk a ni,” a ti.
Kargil district bika bandh pawh muanawm takin a zo tih a sawi a, “A pum puia thlirin Ladakh boruak chu a pangngai a ni,” a ti.
“Thalaiten Bangladesh, Sri Lanka leh Nepal-a inhawr khawma thil phut an lantirna ang chi kha lantir tumna a ni a, kha khan he thil hi a thlentir a ni pakhat a, kan ngaizam mai mai dawn lo va, an chungah hma kan la zel ang,” a ti a. Hei hi climate activist Sonam Wangchuk-a’n thalaite fuih phur zawnga thu a sawi vanga hetiang hi thleng anga sawina a sawi fiahna a ni bawk.
LG chuan union home ministry-in tharum thawhna thlen dan chu a la khawm mek a, mi thenkhat inrawlhte chetna pawh a tichhuak tawh niin a sawi.
Tar lan tawh angin Himalaya tlangdunga awm, Ladakh-ah hian Nilaini khan mipuiten state nih phutna leh an tana hna hauhsak phutna an lantir a, police nen innawr zuiin political party pisa leh police lirtheite an hal a, police pawhin hnawh darh nan silai an hmet puak a ni.
Ladakh hi tun hmaa Jammu & Kashmir state chhunga awm thin niin kum 2019 khan Indian sorkar chuan sorkar laipui atanga awp turin union territory pahnih, Jammu & Kashmir leh Ladakh tiin a then hrang a. Tunah hian state-a hlan kai leh an phut a ni.