Buaina avangin khawvel pumah internet tihthih pung

Buaina avangin khawvel pumah internet tihthih pung
Khawvel ram hrang hrangah sorkarte chuan nikum chhung khan buaina thleng avangin internet an titawp zing hle a, a tam ber kum a ni.
Nikum khan ram 54-ah internet tihtawp vawi 296 a awm a, kum 2023-a ram 39-a vawi 283 tihtawp chu a khum niin Access Now leh #KeepItOn Tangdunin ThawhTannia report an siam an tihchhuahah an tar lang.
A zawna a kum hnih nan buaina chhuak avanga internet tihtawp a tam ber leh a. Mi tuten emaw pawi khawih tuma internet kaltluang an khawih buai avang leh a hrui, a hmun leh service provider an khawih avanga tihtawp a awm bawk.
Myanmar chu khawvel puma internet tihtawp tamna ber niin vawi 85 an titawp a. Access Now chuan an report-ah hian sipai sorkarin ‘kum li liam taa sipai chakna hmanga thuneihna an chanah anmahni duh lotu mipui hrek leh hmeh mih nan an hmang’ niin an ziak.
Ramri pela tihthih pawh nikum chhung khan a pung a. Heng zingah hian Russia-in Ukraine-a a tihtawp te, Israel-in Gaza leh Thailand leh China ramten Myanmar-a an tihtawpte a tel.
India chu kum 2023 chhunga internet titawp zing ber an nihna hlohvin pahnihnaah an tla a, vawi 84 an ti tawp a. Pakistan chuan vawi 21 titawpin an tihtawp tam ber kum a ni.
Middle East & North Africa (MENA) region-a ram 17-te chuan kum 2024 chhung khan vawi 41 internet an tithi a, kum 2023 kha chuan vawi 77 an tithi a. Tithi tlem zawk mah se a tuartu ram erawh 15 atangin 17-ah an pung thung.
MENA ram 10-a thuneitute chuan kum 2024 chhung khan thu lengvak tihtawp nan platform 18 an block bawk niin report-ah hian tar lan a ni a. Hetih lai hian ralthuam kengte buaina chawh chhuah avangin civil mite himna atan vawi 12 an tithi bawk.
Israel chuan Gaza-a indona kal mekah vawi ruk intenet a tithi tawh a, report-ah hian ram dangten nasa takin sawisel thin mah se ‘awmze nei takin’ inbiakpawhna leh telecommunication infrastructure an tichhia niin an tar lang.
Sudan-ah pawh Sudanese Armed Forces (SAF) leh an ep mek, Rapid Support Forces (RSF) te chuan an indo mekah intenet tihthih chu hmanruaah an hmang a, mi maktaduai tel hman service pawimawh an titawp fo.
Kum 2024 khan Anonymous Sudan hacker group an tihten cyberattack an thlen avangin Bahrain, Chad leh Israel-ah internet tihtawp a ni a. Hetih lai hian Mauritania chuan kum 2021 hnua an tihthih hmasak ber tum an tawng ve bawk.
MENA region-ah hian exam kaihhnawiha internet tihthih pawh a awm nual a. Algeria, Iraq leh Syria telin, ram panga chuan vantlangin duh lo hle mah se entawn a awm an hlauh avangin an tithi a ni.