Buaina karah invauna lehkha leh grenade chhar
Manipur-ah chi leh chi inkara buainain a tuam mek laiin, Manipur-a Imphal East district-ah Pathianni khan contractor pakhat inah invauna lehkhaa leh hand grenade chhar a ni a, a chhehvel a tiralkhel hle niin police-in an sawi.
Grenade hi Heingang police station huam chhunga Kairang Makha Leikai Lane 3-a cheng kum 52 mi, Thokchom Shankar-a in luhna gate-ah chhar a ni.
Lehkha an lo dah telah chuan Thokchom-a hi a chhungkaw him a duh a nih chuan a tih tur ti mai turin an ti niin police chuan an sawi. Grenade hi police-in an la nghal a, an chhui zui nghal bawk.
Police chuan hetianga invauna hi sum leh pai leh thil dang inchhuhsak tumna avang a nih theih thu an sawi a, tute tih nge tih erawh an la chhui chiang thei lo.
Hetiang hi Manipur-ah hian a thleng fo va, Imphal West district-a Singjamei-ah pawh tun hnai khan mi chengten hetiang thleng thin duh lohna an lo lantir tawh a. December 12 khan heng lai venga in pakhatah bomb leh invauna lehkha hmuh a lo ni tawh a ni.
Buaina karah invauna lehkha leh grenade chhar
