Indian External Affairs Minister S Jaishankar-a leh Israeli Foreign Minister Gideon Sa’ar-a chu Thawhlehni khan Asia khawthlang buaina sawiin phone-in an inbia a. Chawlhkar ruk vel kaltaa Israel leh American tang dunin Tehran an beih avanga indona awm mek titawp tura US leh Iran inbiakna a hlawhchham hnuah an inbia a ni.
Jaishankar-a leh Sa’ar-a hian Iran nuclear programme chungchang te, Strait of Hormuz-a lawng kal theih dan chungchang leh Lebanon dinhmun te an sawi a niin Israeli minister hian X-ah a tar lang.
Jaishankar-a pawhin Asia khawthlang chungchang an titi dun thu a tar lang bawk a. “Vawiin chawhnu khan Israel finance minister nen telephone-in kan inbia a. Asia khawthlang dinhmun hrang hrang kan sawi dun,” tiin a tar lang.
Sa’ar-a hian Jaishankar-a nena inbiaknaah hian ‘Iran-in nuclear ralthuam a neih theih lohna tur dinhmun hi khawvel pum tan a pawimawh’ tih a hrilh thu a tar lang bawk.
Israeli foreign minister chuan Strait of Hormuz-ah Iran chu ‘eibar laka firfiaka chetna’ thlenah a puh bawk a, hei hian ‘zalen taka tuipuia veivah leh khawvel economy’ a tichhe dawn niin a sawi.
Jaishankar-a hnenah hian hemi chungchangah hian ‘ram zawng zawng, India leh Gulf-a kan thiante pawh tiamin’ hmalak a ngai dawn tih a hrilh thu a sawi bawk.
Israel-in Lebanon-a beihpui a thlakah civil mite an thih avangin India chuan a lungawi loh thu a lo sawi tawh a. US leh Iran inbiaknaah khan Lebanon chungchang hi thil pawimawh pakhat a ni a, chawlhkar hnih inkahhai thuthlung pawhin a huam nia sawi a awm.
Hetih lai hian Israeli Prime Minister Benjamin Netanyahu-a chuan US leh Iran-in inkahhai an kalpui mekah Israel-in Lebanon-a Hezbollah laka hma a lakna chu a huam lo niin a sawi ve tawh thung.
New Delhi-a Asia khawthlanga tun hnaia thil thleng chungchangah minister pahnih inbiakna a sawiah external affairs ministry thupuangtu, Randhir Jaiswal-a chuan Lebanon chu a buai hle tih sawiin India chuan hun rei tak atang tawhin he biala remna leh muanna a awm theih a duh tih a lo sawi tawh thin tih a sawi a. Lebanon-ah hian Indian 1,000 vel an awm tih a sawi bawk.
“Lebanon-a civil mi tam tak thi nia sawi a awm hi kan ngaihtuah hle a ni. United Nations Interim Force in Lebanon (UNIFIL)-a sipai thawhtu ram kan nih angin Lebanon remna leh muanna atana sum dah a nih avangin thil thleng hi a khirh hle a ni,” tiin a sawi.
Buaina sawiin Jaishankar-a leh Israeli foreign minister inbia
